حنية.............. فأر

اذهب الى الأسفل

حنية.............. فأر

مُساهمة  محمود علي محمود في الإثنين أكتوبر 24, 2011 4:38 am

الأسد نازل الإنتخابات في الغابة....ومافي أي حيوان اتجرأ يترشح قصادوا ..قالوا في آخر يوم الحمار أعلن ترشيحوا .. الأسد زعل شديد ومشي للحمار وقال ليهو : أنا لما افوز حأكلك ..رد الحمار: وبكل ثقة وأنا لما افوز حأربطك بحبل وسط الغابة وجات الإنتخابات.... وفاز الحمار وربط الأسد وسط الغابة ومر فار وشاف الأسد مربوط وحنه عليهو وقام فك الحبل وقال للأسد امشي انتقم لنفسك من الحمار ...رد عليهو الأسد : أنا ذاتي ما قاعد ليكم هنا في البلد ....البحكما حمار ...والبحل ويربط فيها فأر...ما تنفع معاي

محمود علي محمود

عدد المساهمات : 10
تاريخ التسجيل : 21/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: حنية.............. فأر

مُساهمة  قريب محمد راجع في الإثنين أكتوبر 24, 2011 7:04 am

أخونا على محمود الله يعطيك العافية .. والله قصتك ده بسيطه ..بس فيها دروس كتيرة وعميقة ومختلفة..
يا خوي أبو محمود ( بعيداً عن نظرية أنو الأسد يرمز القوة .. والحمار يرمز لقلة الفهم) ..... الأسد دا عوير وللا شنو يقوم يخلي الغابة ليه ... الظاهر عليهو جعلي ... وبعدين الحمار مالو ... ما عضو في مملكة الحيوان ... ومن حقو إنو يترشح ... أسع الأسد يقول ... أنو الحمار عندو قروش كتيرة وإشترى أصوات الحيوانات الباقية ... والفار كمان ... ما لو ما برضو حيوان .. بس يعني عشان صغير ... يعني أقل شئ .. قدم خدمة للأسد وفك قيده .. وبعدين بينى وبينك الحمار أفيد لباقى الحيوانات .. ممكن يخدم الحيونات خصوصاً يضرب به المثل في الشغل (حمار شغل) .. على الأقل ما ياكلها .... ومفروض الأسد تكون عندو روح رياضية .. ويعرف أنو البقاء للأصلح وليس للأقوي ويعرف أنو نحن في عصر العولمة .ومفاهيم كيترة إتغيرت .. ويقبل الهزيمة .. ويستعد للإنتخابات القادمة ...
وإذا نظرنا للقصة ده من هذه الزاوية ..نقول أنو ده ما يحدث بالضبط في دول العالم الثالث .. وعندنا في السودان بالذات ... يدخل المرشح الإنتخابات ويخيل أنو هو (الأسد) .. وهو مفروض الذي يحاكم (يفوز) .. وعندما يخسر الإنتخابات ... ما بعترف بالهزيمة ... ويحتج ويقول الإنتجابات ده مزورة ... ولازم تعيدوها ... يبقى زي الأسد وحتى الأسد حسن منو شوية لآنو رضى يربطوه .. ويقوم يشيل السلاح ويدخل الغابة ... مع أنو الأسد طلع من الغابة ... وهذا من الأسباب الرئيسية لتخلف دول العالم الثالث . أنظر من حولنا تجد أن دول العالم الثالث (وطبعا نحن منها) كلها حروب ومشاكل وعدم أمن .. ودول العالم الأول تتمتع بنعمة الأمن والأمان .. وبنعمة العقل .... وخير دليل على ذلك هو فوز أوباما في أمريكا (مع أنو أفريقي وأسود) .. ما طلع أي أسد في أمريكا وقال لا .. وعندنا عبد العزيز الحلو ومالك عقار ... لموا جماعتم وشالوا سلاحهم وقعوا الغابة ....
أتمنى أنو مفاهيم (الأسد) ده تتغير عندنا .. نرضى بالواقع ونتعايش مع الآخرين لآن الحياه حق مشروع لكل المخلوقات ..
تحية لأخونا محمد حسن ..وقول لك ..(الكسرة ) بتاعتك ده فاهمه ... وأنا عاوز أشتري (حق إمتياز إستخدامها ) منك ... أوعلى الأقل تسمح لي إستخدمها معاك ... عشان ما تقوم تشتكيني لإدارة المنتدي (أبوالنسب) وتقول (سرق ) إنتاجي ..
(كسرة) محمد حسن ... ياخوي على محمود أسع موضوعك ده كبير والناس ممكن تطوّل فيه .. ممن يكون فيه وجهات نظر مختلفة... أنا نظرت له من زاوية ... وقد ينظر له شخص آخر من زاوية مختلفة .. ويدافع عن وجهة نظر الأسد .. ويقول .. أنو الزمن ده أصبح البقاء ليس للأصلح (الأسد) بل للذي يدفع قروش أكثر (الحمار) .... أتمنى أنو الاخوة يأخذوا الموضوع من عدة زوايا ... عشان يكون في تبادل للأفكار ووجهات النظر...
لكم التحية والتقدير... في أمان الله ..
ولنا عودة بمشيئة الله

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى