لن تبلغوا الهلال طولا ايها المريخاب

اذهب الى الأسفل

لن تبلغوا الهلال طولا ايها المريخاب

مُساهمة  عبد العظيم قسم الله في الثلاثاء يناير 17, 2012 3:03 pm

وكما قالوا :
أن تكون سيدا .فهذا يعني أنك تدرك الفرق ..بين القائد .. والتابع ..!!
وأن تكون زعيماً ..فأنك تدرك ..أن عثرتك مجد لغيرك وانجازتك موت لهم . .. وتحليقك عاليا هو حزن كبير وقد اشرئبت اعناقهم عجبا لهلال هزموه فى الممتاز وقد تبوء مقعده فى مقدمة الركب السودانى ليعانق كبارا هم الاحلام ..
وحين يذكر هلالنا تحيا قلوب العشاق وإن خسر تحيا موات الآخرين ..!!وحين نرى أزرقه ..تهيم فى الدنيا لتتذوق حلاوتها و تشتم رائحة المطر..وأنفاس الصباح ..
وحين يدغدغ عيناك أبيضه ..تدرك الفرق بين قلبك وقلوب الاخرين وعندها لاتملك إلا أن تصفق لهذا العملاق نشوه …. حتى من لايحبون الهلال ..يعرفون أنهم "يغارون" منه ..يهمسون سراً لأنفسهم .. عن روعته ..ولكنهم تورطوا بغيره ..!!وعجزوا عن العثور على الطريق إليه ..
حين قالوا ان الهلال 120 عالميا .. فلنا ان الامر عادى وليس بجديد فالازرق قد عودنا تقدم الصفوف و غيره وقد فاته القطار رغم كل الاموال وكل الابواق وكل الالسن – وكل الاكاديميات وكل الحفلات وكل النجوم وأنصاف مدنى و ميينزا المخادع وشوبير بياع الكلام والحضرى خميرة العكننه
متعوا اخوتى عشاق الهلال اعينكم بهذا الخبر الرائع :
احتل الهلال المركز 120 عالميا وحسب الاتحاد الدولي لتاريخ واحصائيات كرة القدم(iffhs ) واحتل افريقيا المركز الخامس والرابع عربيا , بينما بقي المريخ فى مركز 281 الذى احرزه الشهر الماضي وهو فى مركز متاخر عربيا وافريقيا .
تصدر برشلونه الاسباني ترتيب اندية العالم واتى ريال مدريد فى المركز الثاني , فريق سارسفلد الارجنتينى تمسك بمركز الثالث كما تمسك مانشستر يونايتد بالمركز الرابع وتقدم مانشستر سيتى الى المركز الخامس
اما على صعيد الاندية الافريقية فقد تصدرها فريق انيمبا النيجيري وحل فى المركز 74 عالميا واتى الوداد المغربي فى المركز 78 عالميا بينما تارجع الترجي التونسي بطل القارة الى المركز 81 وهو نفس مركز المغرب الفاسي المغربي وحل الهلال فى المركز الخامس , واتى نادي القرن الاهلى المصري فى المركز السادس افريقيا و 130 عالميا وبعده باربع مراكز فريق انتركولب الانغولي . ثم القطن الكامروني فى المركز 143 والافريقيى التونس فى المركز 150 وهو نفس مركز فريق الزمالك المصري .
اما على صعيد الاندية العربي ة فقد تصدرها فريق الوداد المغربي الذى اتى فى المركز فى المركز 78 عالميا الترجي التونسي ثانيا فى المركز 81 وهو نفس مركز المغرب الفاسي المغربي وحل الهلال السوداني رابعا ثم السد القطري خامسا , واتى الاهلى المصري فى المركز السادس ثم الوحدات الاردني فى المركز السابع و 136 عالميا والهلال السعودي فى المركز السابع و 138 عالميا .
يجب ان نقول للهلالوبملاء الفم " صحتين وعافية ..!!
وكما يقول ماركيز :
" تعلمت أننا جميعا نود أن نحيا في قمة الجبل ..دون أن ندرك أن السعادة الحقيقية تكمن في تسلق هذا الجبل "
فمع غارزيتو وفالانتاين واتوبونج وسادومبا ونزار والباقون سنصعد الجبل وسيغرق غيرنا و كل الاقزام - سيعتلى الازرق منصات افريقيا ولن ينظر لمن ينثرون حوله كل الاشواك فأفرحى جماهير الهلال بتصنيف يثلج الصدور
وحتما ستكون سماء 2012 زرقاء صافيه ولن ترى اعينكم نيران روما الحمراء ولن يصرخ اطفالنا وهم نائمون ولن تموت اشجارنا ولن تذبل اوراقها عطشا
قالوا نحن احرزنا كأس مانديلا قلنا انتم لم تحرزوه بل احرزه آبائكم وأجدادكم وقد قال الشاعر : ليس الفتى من يقول كان ابى ان الفتى من يقول هاانذا – انه حقا الخسران المبين ان يظل المرء متكئا على وسادة وهو يجتر تاريخ من سبقوهلينسبه لنفسه
لقد قال قائلهم ان اهل الهلال يتشدقون كثيرا بهذا التصنيف وهم لا يملكون كأسا كما نملك - قلنا لهم فما جدوى احراز الكؤؤس وان يتراجع التصنيف الى مدارك المؤخرة .
اسفى اخوتى ان يكون فى بلادى من يتجاهل هذا التصنيف العالمى العظيم
وأسفى أخوتى ان يختزل هؤلاء كل تاريخهم فى كأس مانديلا العتيق والذى عفى عنه الزمان
هنيئا اخوتى للهلال الذى ظل يتقدم كثيرا وفى سودان لم يشهد من قبل تقدما أو تصنيفا أوارتقاء"

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  قريب محمد راجع في الخميس يناير 19, 2012 7:04 am

والله يا أخونا عبد العظيم غنيت في الهلال .... وقلت ما لم يقله مالك في الخمر .... وما لم يقله المحلق في تاجوج ... أيه دا .. والله إذا واحد ما يعرف الهلال ... وقراء هذا الشعر المنثور .... يقول أنو الهلال دا أحسن فريق في العالم .... و زيو ما في ... ويحتل المركز الأول على العالم .. مش الـمركز الـ120 .

طبعاً إنت من حقك تغني زي ما إنت عاوز ... ومن حقك تفتخر بي فريقك كما يحلو لك ... الذي إحتل المركز 120 .... وأنا زاتي أتمنى أن يحتل الهلال المركز الأول .... بدل المركز الـ120.

لكن ليه إنت تقلل من قيمة الأندية الأخرى ....... وعلى رأسهم الزعيم ... زي كأن هذه الأندية لم تأخذ كأس الدوري الممتاز !!!! ولا كأس الكؤوس الأفريقية (الكونفدرالية) .... وكأن الهلال مكوش على كل الكؤوس...

وبعدين شي جميل تكون على ثقة أن الهلال مع ..... غارزيتو وفالانتاين واتوبونج وسادومبا (كلهم أجانب ) .......... سوف يصعد الجبل (القمة)......

لكن ليه ..(وسيغرق غيركم و كل الاقزام)..... وليه ح تعتلوا المنصات الأفريقية ... وغيركم لا .. خصوصاً غيركم ... إعتلوها قبل كدا ... وأنتو لا .... ليه ما تتمنى لكل الفرق السودانية الأربعة المنافسة في أفريقيا إعتلاء منصات التتويج .... ليه الهلال فقط .... ليه الأنانية دي .... ولا دي بس غير ...... من الزعيم لأنو الفريق السوداني الوحيد الذي إعتلى القمة قبل هذا .....

وبعدين أيوه ..... نحن احرزنا كأس مانديلا ....أسع أول أمبارح عام 1989 .... بعدين (آبائكم وأجدادكم ) ... ما هم المريخ نفسو ... (ولا كانو زمان الهلال ونحن ما عارفين ) ... وهو الفريق السوداني الوحيد الذي إعتلى منصة التتويج في أفريقيا حتى الآن ... ونتمي من الهلال أن (يشد حليو) شوية .... ويعتلى هو كمان منصة التتويج ....

وكيف يكون إحراز الكؤوس الأفريقية ما عندو جدوي ... العكس هو الصحيح ... ما جدوى إحتلال المركز الـ120 ... بدون حراز الكؤوس الأفريقية وإعتلاء منصة التتويج ...

وزي ما إنت عارف يا أخونا عبد العظيم ... أنو هناك في سجلات الإتحاد الأفريقي .... في السجل الذهبي ... مسجلين الفرق التي أحزرت الكؤوس الأفريقية فقط .... وإسم الزعيم (المريخ ) الأحمر الوهاج ..... هناك مسطر بالذهب .... نتمنى من الهلال (أن يعمل شوية همة ) ... عشان هو كمان ... يسجل أسمو ...

واحد من ظرفاء الهلال ... قالوا له ... إن الهلال ما عندو كأس من خارج السودان ... قال ليهم ... شفتو ... هدف لاعب الهلال صبحي في مرمي الزمالك في الدورة العربية في جدة .... هو الكاس حقنا من خارج السودان ... طبعاً تم إختيار هدف صبحي كأجمل هدف في الدورة ....

تحياتي لكل الرياضيين ... بكل إنتماءهم ... وأولهم الأخوان الهلالاب .... وأتمنى أن تستطيع كل الفرق السودانية أن تركب سفينة نوح .. آسف (الهلال والأجانب ال معاه) .....ويصعودا الجبل (القمة ) ... ما يغرقوا زي جماعة سيدنا نوح ....

بس يا خونا عبدالعظيم خلينا من الكلام دا كلو .. وقبل ما أختم كلامي ..... عاوز أسألك سؤال برئ جداً ... جداً ... جداً .. بس ما تزعل ... مسئول من الخير ... البرير ... أخبارو شنو ؟؟؟ ...

التحية والسلام لجميع الأخوان ... أل هنا ... وال هناك .... وفي أمان الله

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  عبد العظيم قسم الله في الجمعة يناير 20, 2012 1:30 pm

اخونا واستاذنا عباس اسعد الله مساك تعجبت لاستنكارك للكلمات التي ذكرتها في حضرت الهلال سيد البلد وزغيم افريقيا وانا اقول ليت الله اححل عقدتا من لساني لاوصف كامل الاوصاف ... بل ليته جعل لي لسان صدق لاوصف صدق حبي له ..بل ليته لم يسدل الاستار فوق جمالة .بل ليته سلب العقول ولم يعلل احدا نفسة بمناله انه فن رفيع لايتذوقة إلا من بحمل الذوق المرهف .

اعود لمناسبة الفرح من حق كل سوداني ان يفرح عندما يحتل فريق سوداني المركز 120 عالميا والخامس افريقيا والرابع عالميا من قيل تصنيف دولي عالمي (الفيفا ) ووصيفه المريخ يحتل المركز 281 عالميا ومراكز يستحي ذكرها افريقيا وعربيا من حقنا نغرح عندما نتقدم على فرق كبيرة مثل الزمالك المصري والافريقي التونسي والقطن الكمروني والسد القطري والهلال السعودي والوحدات الاردني صاحب اشهر 7 سبعة في كاس العرب في مرمي المريخ حتى هنالك فكرة ان يسموا المربخ (ابو سبعان ) وين كاس مانديلا كاس الاغاسة ( الغير مسجل في الفيفا ) وياخي ولو مثل هذه الكاسات تشفع لكان كاس السلام في الكنقوا عام 1966 الذي حققة الهلال وما اظنك سمعت به لان الهلال لاينظر ولا يتفاخر بمثل هذة البطولات واتحدى اذا وصل المريخ في تاريخة منذ تاسيسة للمربع الذهبي في رابطة الابطال الافريقية الهلال يناطح السحاب لا يناطح الظلال .ـ

اما سخرتك عن الاجانب في الهلال اذكر لك الاجانب في المريخ على سبيل المثال وليس للحصر وهم باسكال واوا ـ واديكو ــ و جون سكواها ـــ ومابكل ـــ وارغو ــ وكلتشي ــ والحصري ــ والدافي يعني فريق بحارسة (الحضري ) ولكن الناتج خروج من قولت تييييييييت معليش من قولت تييييييييت الكيبورت علق معاي كانه عارفك بنحبها

اما سوالك عن البرير تسال منك العافية مازال صامدا ويدعم الهلال بسخا لانه يحبه وما ضرب الحكم إلا من شدت حبة وقديما قيل من الحب ما قتل ..... ولكن المشكلة الكبيرة الحالية امام الاتحاد السوداني ليست مشكلة البرير الذي ضرب الحكم نتيجة انفعال ... المشكلة ان عادل ابوجريشة سكرتير المريخ متهم بالاتجار بالبشر لانه عنده وكالة استقدام او استخدام بيجيب عاملات ارتريات واثيوبيات بكميات كبيرة دون ضوابط من ما تسبب في مشاكل اجتماعية الله يستر ؟؟؟؟؟؟؟؟؟؟
والمهم ما نسبق الاحداث يمكن السنة دي العشر يقوم له شوك وتستفيدوا من ولدنا (ريكاردو ) ما تخرجوا من قولت تييييييت

اخي العزيز من غير تييييت اتمنى لكم وانا صادق ان يوفق الله الفرق لاربعة السودانية وتبلغ النهائي وتحقق نجاحات كبيرة وان يثلج صدورنا الاحمر الوهاج (الرد كاسل )

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  قريب محمد راجع في الثلاثاء يناير 31, 2012 12:27 am


أخونا عبدالعظيم لك ولجميع الأخوان التحية والسلام ... آسف للتأخير ... لأنني أنا كنت .. هناك .... وإنشغلت شوية هناك ...

بداية أود أن أهنئ الأخوة الرياضيين ... بل كل السودانيين ... بوصول المنتخب السوداني لدور الثمانية في كأس أفريقيا .... والمرة دي ما خرجنا ... من قولت تيييييييييت ... وأتمنى أن يصل النهائي ويأخذ الكأس كمان.

أخونا عبدالعظيم .... أنا ما إستنكرت .... أنا إستغربت .... طبعاً من حقك توصف فريقك زي ما إنت عاوز ... وتفرح زي ما إنت عاوز ... لكن بس ما تقرن ذلك .. مع تقليل شأن الفرق الأخرى...

عموما .... المرة دي كلامك مصّلح شوية .... كان في الأول (فول ساده).... المرة دي بقي (فول بالجبنة) ....

أنا إتفق معاك .. إنو الهلال (سيد البلد)... لكن (زعيم أفريقيا) ..دي كيف تجي بس ؟؟؟ .... يعني زعيم .. وما يأخذ ولا كأس واحد في أفريقيا ؟؟؟ ... يكون زعيم كيف ؟؟؟ .. يعني الأندية ال أخذت كأس (زي كاس مانديلا) .. ولا الكؤوس الأخرى يكونوا شنوا ... يكون (سوبر زعيم ) ؟؟ ..

هو دا واحد من أسباب الإستغراب ... يعني إنت ح تقول شنو في الهلال لو أخذ كأس أفريقيا .. مرة واحده ... ح تقول الهلال فريق من كوكب تاني .... وإحتمال تطردونا من البلد ...

وبعدين سؤالي عن البربر ... سألت ساكت ... سؤال برئ ....لأنو سمعت أنو الحكم ... هو ال كان منفعل ... وبعدين الحكم ضرب البرير بي وشو .. في يدو ...... عشان كدا أغمى على البرير أثناء المباراة نقلوه للمستشفي ... أما عن مشكلة أبوجريشة إذا كان برئ أو مذنب .... إتحاد الكرة والمريخ .... دخلهم شنو بيها ... دي مشكله تخصو هو ... المريخ ما عندو دخل فيها .... دي قضية خارج الحقل الرياضي ....

بس خلينا في الحقل الرياضي ... وبسألك وبستغرب برضو .... كيف العشر يقوم ليهو شوك ... طبعاً دي كناية عن (المستحيل )... يعني زي كأنك تقول ممكن السنة دي يحصل المستحيل (العُشر يقوم ليهو شوك) .. والمريخ ما يخرج من قولت تييت .... من بطوله أفريقيا ....


أنا زيك أتمنى أن لا يخرج المريخ المرة دي من قولت تيييييييييت ... وإتمنى أن يأخذ الهلال كأس أفريقيا ولو مرة واحدة ... بس ما تطردونا من البلد .... بس أنا عاوز أسألك المرة دي سؤال برئ .. بالجد .... أخبار إستاد الدوم شنو ؟؟ ...

التحية لك أخونا عبدالعظيم ... لجميع الأخوان الرياضيين ... و ال ما رياضيين .. ال هنا ... وال هناك .... في أمان الله .................

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  عبد العظيم قسم الله في الثلاثاء يناير 31, 2012 5:58 am

اخي العزيز عباس حمدا لله على سلامتك وعودتك لبيتك (منتدى الدوم ) كنت خائف تذوق ذي صاحبنا ابوجلابية زرقة وشالة زرقاء ***نجم نجوم المنتدى *** كان محلي الشغلة شوية ومحركها في الرياضة وفي السياسة رغم اتفاقنا معه في واحدة واختلافنا معه في الاخرة ونحن نرفع له الراية الزرقاء ليرجع ونرفع له القبعاء الزرقاء اعترافا بمقدراته الصحفية وهو من الشباب الممتازين والموهبين نتوقع له مستقبل جيد وليته يعود من اي باب يشاء واذا كانت تضايقة مداخلاتنا سنكتفي بالقراء له فقط .

اما انت اخي العزيز رغم اني قابلتك كثيرا وجلست معك ولكن لم اعرف انك بهذة الروعة والجمال في كتاباتك صدقني كنت ادخل بصورة يومية للمنتدى وعندما لا اجد اسمك على احد المنتديات اخرج ليس تقليل بالاخرين ولكن اعجابا بكتابتك واسلوبك الجميل وبعض القفشات التي تجعلني اموت من الضحك وانا اقراءها ولكن هذا ليس بالقريب على شخص خريج فلسفة .

اما عن وموضوع نحن عاوزين نطلعكم من البلد اذا اخذنا كاس افريقيا لا ياعم ... انتو اذا طلعتوا من البلد نحن نغلب مين نحن عاوزنكم عشان نغلبكم في المحلي والافريقي في الرايحة والجاية يعني ذي مابيقول المثل (حقيرتي في بقيرتي ) ومرة مرة كدة نخليكم تغلبونا عشان تاديكم ما يتفرتق ويشلع وجماهيركم ما تفلعنا ,,,و لانهم معروفين بتاعين حجارة ودا ما كلامي انا بل تقرير الاتحاد الافريقي ؟؟؟؟؟؟؟ ياصفوة .

اما فوز المنتخب ولم يلع من قولت تيييييييت دا شي طبيعي لان الناس المتعودين يطلعوا من قولت تييييت قليلين فيه والاساسين ناس دور الاربعة في البطولات الافريقية ناس بشة وكاريكا وسيف مساوي البيجرح ما بيداوي وحظ ناس قلق وبلة جابر يتمتعوا باللعب الفنون الكروية وهم يلعبون بجانب ناس مهند وهيثم وتلاقيهم كل شوية ياخذوا صور معهم للذكري والتاريخ .

اخي العزيز ما تقوم تصدق اني متعصب لهذه الدرجة والله العظيم فوز المنتخب اثلج صدري وفرحت به جدا وكنت ذي المجنون وفي لقطة اصيب مصعب عمر كنت عايز اكسر التلفزيون من القضب واشجع بلة جابر وقلق ومصعب مثل ناس مهند وكاريكا ويمكن اكثر حتى خفت على نفسي اقوم انتكس اوشجع الاحمر الوهاج اخر العمر وبامانة تمنيت ان يستمر الوضع كدة لا هلال ولا مريخ نحس بالوحدة حتى لو فقط في الكرة ونعيش نفحات الوطن وشعور جميل عندما تذهب للعمل وتقابل الغير سودانيين يباركون لك الفوز الذي ساهم فيه كل من ارتدى شعار الوطن اتمنى ان نصل للنهائي وحتى الكاس ومن حقنا ان نحلم ما دام وطننا به نجوم بهذا المستوى الرفيع .
وختاما الف الف مبروك لنا جميعا بكل اللوان طيفنا الرياضي التاهل للربع النهائي .
اخوك /عبد العظيم محمد

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  قريب محمد راجع في الأربعاء فبراير 01, 2012 7:27 am

أخونا عبدالعظيم بعد السلام .. والله أنا ما زغت ... أنا بس كنت هناك ... ولو إنت جيت هناك كان شُفتك ... لكن ال (كابي الزوغة) بالجد ... هو أخونا (نجم نجوم المنتدى) ... وفي الحقيقة كل نجوم المنتدى (كابين الزوغة) اليومين ديل .....

إنت عارف يا عبد العظيم .... أخونا ود القاضي ...بكون لبس جلابيو الزرقاء ... ولف شالتو الزوقاء .... و(فرتق ) رجع بورتسودان تاني .... يمكن عجبتو أكلة (المخبازة) بتاعتكم العجيبة ديك .... لكن ... أكيد ... ح يرجع .....

أما حكاية تطلعونا من البلد إذا أخذتو كأس افريقيا ... لالالا إنتو ما مضمونين ... يكمن تقولوا ... نحن تاني ما ح نلعب محلي ... ح نلعب أفريقي بس .... وتقوموا تطردونا ... مش كدا وبس .. وكمان ... كل واحد تدوهو ....(كف )... زي الحكم .... أصلوا حكاية (الكف) دي ..... ح تبقى موضة (تقليعه) عندكم .....

وبعدين الناس الأساسيين في المنتخب ديل زاتهم ... ما ح يلعبوا في الهلال ... غير سيف مساوي .... إنت قلت لي ليه .... لأنو أصلو ... بشه وكاريكا بيلعبوا في المنتخب بس ... ما بيلعبوا في الهلال ... هو سادمبا ما مديهم فرصه زاتو ... وهيثم مصطفي قال ...ح يعتزل السنة دي ... ومهند الطاهر .. طبعا حكايتو معروفه ....

وبعدين هيثم مصطفي وسيف مساوي ... بياخذو صور تذكارية بالفنله الحمراء بس ... طبقا بقولوا دي فرصة نتصور صور تذكارية بالفنله الحمراء ... أما المبدع مهند الطاهر ... طبعاً .. بجرب في الفنلة الحمراء من أسع ... لأنو الموسم الجاي ... ح يلبسها على طول.... ح ينتقل للمريخ ...

أخونا عبد الله الحسن كبودي .... طبعاً هلالابي موت .... في اليوم التاني .. بعد نهاية مباراة السودان وبوركينا فاسو .... (وأنا في الحقيقة ما شاهدت المباراة) ....... قام دق لي تلفون ...... قال لي ... ناس الهلال بس ال كانوا لاعبين كويس ... ناس المريخ كانوا (ينططوا ساكت) ...

قلت ليهو ... ناس المريخ زي الخيل الحرة ... (بيظهروا في اللفه ) ... في مباراة زامبيا ... (ح ينططوا بي فايدة) ... وح يلعبوا كويس ...

قال لي : - والله لو غلبنا زامبيا ... وصعدنا لدور الأربعة .... تاني بعد داك ما دايرين أي شي ... ولو إتغلبنا 70 صفر ..... ما مشكلة....

قلت ليهو .. ليه يغلبونا بعد داك... 70 صفر ... إنشاء الله نأخذ الكأس كمان ... خلينا نحلم ..هو الحلم بقروش ....

ختاماً أخونا عبدالعظيم ... أنا بضم صوتي إلى صوتك ... حتى نرى نجم نجوم المنتدي ... ساطع في سماء المنتدي .. كما عودنا ... وبرضو نتمنى أن نرى .... نجوم المنتدى الآخرين .... منورين المنتدى كعادتهم ....

التحية التقدير لجميع الأخوان ال في المنتدى ... والخارج المنتدي ... وفي أمان الله ....

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: لن تبلغوا الهلال طولا ايها المريخاب

مُساهمة  عبد العظيم قسم الله في الخميس فبراير 02, 2012 6:16 am

استاذنا العزيز لك التحية وانت وحدك تسجل الحضور الدائم والمستمر بالتواصل مع كل الاخوان رغم انتشار مرض اسمة ( الفيس بوك ) جعل الناس يهربون من المنتديات رغم صغر المشاركة في الفيس بوك وان المشاركة فيها تختفي بسرعة ولكن جيل اليوم اصبح لا وقت له للكتابة ويكتفي بالصور والكلمات المختصرة وهذا مؤشر خطير مستقبلا وستضيع العبارة الشهيرة (القاهرة تكتب وبيروت تطبع والخرطوم تقراء ) ولان من لايقراء لا يكتب .

ولكن الغريب ان الفطاحلة مثل احمد ادريس وعبد الرحبم ودحسنة واحمد اخوك وعلي محمود ومن العنصر النسائي والتي كانت تشكل حضور دائم (بثينة محمد سعيد ) كل هولاء اين اختفوا ودا سؤال محير جدا ؟؟؟؟؟؟ اتمنى من الله ان يعودوا ويكونوا بخير
اما كلام عبد الله قورو ما صحيح انا حضرت المبارة والله مصعب عمر ورمضان عجب واكرم الهادي كانوا نجوم المبارة بس عيبهم الوحيد انهم مسجلين في المريخ لان مستواهم دا ياهلهم بان يلعبوا مع سيد البلد واحتمال كبير يكنوا الموسم الجديد ضمن كشف التسجيلات في الازرق .
اما ولدنا مهند الطاهر عشمكم فيه عشم ابليس في اللجنة وصرح لكم بالعربي كدة مستحيل اللعب مع المريخ وعلى فكرة عندي معه علاقة صداقة قوية والسنة الفاتت كان في العمرة هو والدته كنت معه لحدي ما سافر وسالته عن كلام مزمل ابو القاسم عنه بانه ماشي المريخ قال لي يا عبد العظيم في السودان في شنو احسن من الهلال عشان امشي له وهو انا عارفة ما حيفارق الهلال إلا اذا وجد احتراف خارجي وهو زعلان من ادراة الهلال لانهم ضيعوا عليه صفقة الانتقال لنادي بنياس الاماراتي ولكن بمستواة في بطولة افريقيا الحالية اتوقع له ان يجد احتراف في اروبا وانشاء الله يتوفق .
اما سادمبا عنده الموسم دا يعديه والله معه الهلال صنعه وقادر يصنع غيرة لانه مدرسة اما وبشة وكاريكا ديل اولاد الهلال ونحن خالنهم بصرة العاوز كوي ندية (مسمارين تشة من بشة ).
اما موضوع البرير في ناس سبقوة في مبارة انتركلوب الانقولي جروا وراء الحكم ناس ابوجريشة وجماعتهم والاتحاد الافريقي حاكمهم ولكن ليس هم بقدر البرير ولا فريقهم في حجم الهلال عشان كدة موضوعهم مرة مرور الكرام وانا بلوم البرير انه نسى نفسة رئيس نادي يغرفة العالم كلة والاول عربيا وافريقيا حسب تصنيف الفيفا عندما وقع الحادث وهذا ما كبر الموضوع وجعل اعداء النجاح بروجون للموضوغ .
واخيرا اتنمنى للسودان الفوز امام زامبيا يوم السبت والتاهل لدور الاربعة وانا متفائيل لان عتدي بنت اسمها نرمين (نمونة ) دي الاختبوط حقي اجيبها دائما في مباراة الهلال ولما الله يهديها وتجلس معاي تحضر وتدعي الهلال يفوز حتى لو كان متأخر والمبارة الماضية السودان وبوركينا الله هداها قعدت معي لحدي النهاية تدعي وطبعا اخذت 5 ريالات هدية الفوز وناس الجمعية لما يحضروا معاي يفولوا لي جيب نمونة ولما ترفض تجلس معاي نعرف النتيجة خسارة والجماعة المريخاب ناس قرشي لما يجوا عندي في البيت يقولوا لها قولي انشاء الله الهلال ينهزم تقول لهم ابوي بيزعل والمهم عاوز يوم مبارة زامبيا اجيب لها شوكلاتة كثيرة وما اخليها تقوم من جنبي وقرشي ومحمد احمدون يقولوا لي يوم مبارة الهلال نجي نخطفها نودبها عند ناس جبوبتها .

اخي العزيز الحديث معك شيق بس ومواعيد الدوام الثاني جاءت والله ينصر السودان حتى لو نمونة كانت عند ناس جدها .

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى