مهما طال في النهاية محال ..

مدثر القاضي السبت أبريل 07, 2012 5:15 pm

احبابي واخواني ناس المنتدي الزينيين السلام عليكم ورحمة الله وبركاته
والله ما عارف اقول شنو لكن حابي ابدا بـــ:

مانسيتكم مانسيتكم يشهد الله انا مانسيتكم
لانسيت ريحه دروبكم وحاله الناس التكافح ... كسرة الصاج المولع وخرطه الحوش التصافح .... زير وراكوبه وبرنده شفع الحله التفلع في الطيور الراجعه دابا... والأيادي المابتشلع غيرا لا قانونا غابه... انا مانسيتكم يشهد الله ولانسيت لبس الطواقي وروعه الناس في التلاقي وصوت طنيبرا"حنين جاي من بين السواقي البيوت الفاتحه بابه بتلقي فوق بيبانه دايما الف مرحبتين حبابك جيتنا زاير والله جابك ابقي داخل للدواخل وانت لسع في المداخل والبشاشه الفوق سلامن ياها من عهد الصحابه ومانسيتكم ..

مهما طال الغياب عنكم فهو من المحال ان ننساكم ونغيب عنكم ..
حقيقة الفترة طالت وكنا مشغوليين بمشاكل الحياة والجري فلا نملك الا نعتزر لكم عن هذا الغياب
وحقيقة اشتقت لكم وما نسينكم ويشهد الله دا انا ما نسيتكم
لا نسيت السياسي ولا الرياضي ولمة الناس ف التلاقي
والونسة والهظار ومجادعة الناس الحَسسة ..
وشوقي الخاص للريس عبد العظيم قسم الله البيهو النقاش يتحلا والسيد قريب البسوي العجيب والدكتور عبد الرحيم ود حسنة وبثينة وخالنا العزيز عبيدون وكل اهلنا الطيبين
فردا فردا ..
حقيقة انشغلنا والقروب شال مننا الكتير لكن المنتدي يبقي المنتدي بكل توثيقاته وكتاباته الرائعة وصور بلدنا وتوثيقات عاداتنا وتقاليدنا ومواضيعه الهادفة ومن هنا ندعو جميع الاهل والاعضاء للرجوع للمنتدي والتفاعل مع المنتدي حتي لا يضيع كل هذا الجهد وحتي نكمل مسيرة اخواننا الزين بزلو وضحو بالغالي والنفيس لبلدنا الحبيبة

دخلت المنتدي ولقيت ما شاء الله في حاجات كتييييييييرة شي مواضيع وشي ناس جداد والحمد لله المنتدي ما انقطع ودا بي اصرار احبابنا عبد العظيم وقريب النشيطين دوما
ويا قريب في لاعب جديد خشا المنتدي والله الزول دا خطييييييييييير ولعاب شديد خلاص دا جبتو من وين ؟؟
ياخ دا نزل كابتن طوالي بدون اي مقدمات وقعد الناس الكنب والاحلي من كدا ادي صاحبنا كدا بيضة وواقف معاهو وقفة شينة ههههههههههههه
قايتو ما شاء الله حقيقة اضافة يا الرشيد وانشاء الله الي الامام وبي سرعة النمر ..

اكرر اعتزاري للغياب وعارف السنة دي ما عندي حق اعمال السنة لكن انشاء الله بنجازف ف الامتحان نقفلو عشن يعوض لينا بس كمان عايزين الباقين يجو عشن ما يكون فصل للغياب نتمني من كل الاعضاء الدخول والمشاركة لا نكتفي بالقراءة والمرور

تخريمة : يا عبد العظيم صاحبنا دا مع الخماسية وقبلها الثلاثية الله لا جابو لينا ومع السندمبة والفلتنة الله ينجيهو السنة دي ههههههههههههه
يا انت تعال لينا بهناك دايرين ندور الدوري لكن بس ما تجي براك الا نحنا كتار وخايفك ما ااا ....

تحياتي لكل الاهل ولنا عودة انشاء الله ..

قريب محمد راجع الثلاثاء أبريل 10, 2012 7:07 am

التحية والسلام .... لنجم نجوم المنتدى .... حمد لله على السلامة ... إنت كنت وين ... والله لو ما عارف إنك إنت (شامِي) جماعة عبد العظيم (الإنقاذ) ... كان قلت إنك ... في جنوب كردفان .. مع الدفاع الشعبي ... مجاهد ...

يا زول مرحب بيك كثيييير ... وبدون إمتحان .. هو نحن لاقين ..... والدرب ال جابك ... نسأل الله أن يجيب بقية (العِقد الفريد ) .... ويرجع المنتدى زي ما كان وأكثر حيوية ...

وبعدين اللاعب ال خش المنتدي دا (ما جديد ) .. قديم بس كان (كابي الزوغة) .... إنت ما تعرف الرشيد عبد القادر .... معقولة !!! ....

وأخونا الرشيد ما أدى صاحبك بيضة وبس ... كمان شابي ليهو في حلقو .... يلا بختك ..... أعمل معاهو حلف ... و ورونا شطارتكم .... مع صاحبكم .... والمشكلة كمان هلالابي قاطع ..... ( معارضة ...مع هلالاب ... مع حكومية ) ... يلا أحلى (جوطة) ..... زي المصارعة ... مصارعين كتار في حلبة مقفولة ..... مرة معاك ... ومرة ما معاك ....

وبعدين في التخريمة بتاعتك ... إنت وصاحبك ..... تتكلم عن الثلاثة بتاعتكم ... ولا .. الثلاثة بتاعتنا .... .... الظاهر ناس الهلال ..... مشوا نيالا .... ولعبوا مع فريق درجة ثانية ... و(خمونا) .. وقالوا .. فريق دبلوماسي !!!! ...

مرحب بيك مرة ثانية ... وما تكب الزوغة .... وتحية خاصة للاخوان عبد العظيم والرشيد ... ولجميع الأخوان ... وفي رعاية الله وحفظه ....

مهما طال في النهاية محال ..

مهما طال في النهاية محال ..

رد: مهما طال في النهاية محال ..