بدون عنوان ......

اذهب الى الأسفل

بدون عنوان ......

مُساهمة  قريب محمد راجع في الأحد مايو 13, 2012 7:22 am

أخييييييي خي .... يا أخونا عبدالعظيم ومدثر القاضي ودكتور مرتضى .....الله يقرفو الهلال ... طمم بطنكم(نا) .... شوف بالله .... ما قادرين يحافظوا على النتيجة ... 10 دقائق بس .... لو كان طبقوا خطة (واحد / عشرة) في الـ 10 دقائق دي بس ... كان تأهل الهلال ... بالله الهلال يطبق في خطة (واحد /عشرة) مع المريخ (90) دقيقة وما قادر يطبقها مع شلف 10 دقائق !!!!!!!!!!!!!!

أسع يا أخونا عبدالعظيم ومدثر القاضي ودكتور مرتضى ... دي ما حاجة تغيظ ... بالله إنتو قاعدين .... (تهرطوا) لينا .. الهلال ما أدارك ما الهلال ... وسيد البلد ... وشنو ..شنو ما عارف ... وفريق أسمو شلف ... يطيركم من دوري الأبطال ؟؟ ... هو بالله .. أسع شلف دا فريق ... أول مرة أسمع بي فريق أسمو شلف .. جمعها (شلاليف ) ... معقولة !!! .... أخيييييييي خي ....

يعنى .... لو لعبتوا ضد مازمبى ...كان ح يحصل ليكم شنو !!!

بعدين .... نحن ما قلنا ليكم .... ما تجونا ... في الكنفدرالية .... خليكم هناك ... إنتو جيتوا شاردين من هناك ليه ..... فرصة الهلال في التأهل لدوري الأبطال ... كانت كبيرة ... كبيرة جداً .... بالله سادمبا (أبو رأسين) دا .. ما قادر .. يجيب ليهو ..هدف واحد بس ... هو أصلو .. سادمبا لمن يكون واحد من (الرأسين) معطل ... بشغل الرأس التاني ... لكن ...مع فريق شلف ...الرأسين كانوا معطلات ....

يا أخوني آنا آسف .. (أنا بنكت ) عليكم ... بس دي من أبجديات ولوازم ... الدردشة في الرياضة ... ورغم أنو المريخ برضو ... طار ... لكن بس نحن كنا متوقعين .. الطيران ... وكمان كنا عاوزين الكنفدرالية ... بس ال ما كان متوقع .. إنكم .. تجوا جارين ورانا ....

لكن ما دام جيتونا في الكنفدرالية ... مرحب بيكم .... ونتمنى ليكم التوفيق ....... وفي أمان الله




قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  مدثر القاضي في الأربعاء مايو 16, 2012 1:50 pm

الغالي دوماً قريب محمد راجع تحية طيبة
عزرا اذا تاخرت المشاركة ..
والله ما عارفين نقول شنو واااااا اسفاه علي الكرة السودانية
انت دايرني اشكر ليك الهلال ؟ والله ما بشكرو ليك وكعب وفوقو طبقين رماد
وكان في زول قالك الهلال كويس اطبظلو عينو وكان قالك المريخ تمام اطبظلو عيونو الاتنين ..

انا غايتو مفكر اقلب اهلاوي هههههه التيم دا يا غريب شاب وقايم يا دوب وعندو مستقبل وعيني باردة عليهو
ياخي فريق مقلوب 3 يا دكتور ويجي يتأهل والله يستاهل يقيفو ليهو ويرفعو ليهو علم لانو اعطي الكورة فاعطتو التاهل
التحية بلاي لنمور شندي ..

وبعدين انت تعال هنا يا قريب شابكنا اخييييييي خي ههههههه خلاص انت يعني ما شاء الله عليك كدا واتاهلت وحققت فوز باهر هههههههه شرفتنا وشرفت السودان ايما تشريف
ما قصرتو تب وانتو كل همكم انو تطلعو باقل خسارة يعني هدفين تلاتة بس ما يجيبو الخمسة هههههههه
بالله يا عبد العظيم الناس ديل شدة ما خايفين المدافع اداهم الكورة هههههههههههه خوف ساااااااااااااي قالو هاك جيب قوون ومال لو كانو سخنو كنتو بتعملو شنو؟

وين الجماعة البتهرطو بيهم اديكو وين سكواها مشو وين ؟
(اخييييييي خي)2 (تربيع) يا مريخاب ... نحنا والله مرقنا الحظ وضربات الجزاء لكن كورة ولعب ما بمرقونا كان قعدو للحول ........ وياما الابطال ح تفقد عزيز خمسة سنين كانت لها طعم خاص وكان الهلال محطة ووقفة وعثرة لابد ان يمر بها اي بطل لافريقيا نعم قد نكون لم ننل غايتنا ولكن دوري الاربعة في الابطال لاربع سنين في حده انجاز يحسب للكرة السودانية
الكونفدرالية راجياكم اها نشوف فصاحتكم دي ؟؟

بنرجع ونقول نحنا الهلال بنريدو جد...نهواه ونعشقو للأبد.. نهواهو في كل الظروف

لوماكان هو الهلال ماكنا شجعناهو ويكفي المريخ شرف في الصف يختو وراهو ده سيدا وسيد بلد والكونفدرالية جات تبراهو ... ^ ^

التحية لكل الهلالاب وما سمعناك يا دكتور ..
ويا ريس وينك ووين ردك لقريب العجيب دا يخاجن ويتف فوقنا ... هههههههه

التحيو لكل اللرياضيين وفي امان الله


avatar
مدثر القاضي

عدد المساهمات : 91
تاريخ التسجيل : 20/09/2011
العمر : 28
الموقع : m.algady 1001@ yahoo

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  عبد العظيم قسم الله في الأربعاء مايو 16, 2012 5:37 pm

الاخوان الافاضل عباس ومدثر كيف حالكم ولكم التحية وانتم تنثرون الورود بكل الوانها على صفحات المنتدى .

اخونا عباس لازم تشوف لك واحد معك حتى لو محترف "مصري " بس مايكون مضروب ذي الحضري لان هنا (في المنتدى الرياضي ) معاي (نجم النجوم ) وقلمه يتلف بحرير بس حرير (ازرق ) وبالله مش حاجة عجيبة نلتقي رغم التباعد في اللون السياسي والموضوع دا يذكرني بالعم (عبيد بابكر الشيخ ) وعلاقتي به قوية جدا منذ ايامي كنت طالب واكثر شي كان يجمعنا العشق القوي للازرق (الهلال ) واما السياسة كان اختلاف تام طبعا هو اتحادي وطني ومرة شافني اتناقش مع جماعة مريخاب بقوة وعجبه كلامي قال لي انت عارف يا عبد العظيم احسن حاجة فيك انك هلالابي لو كنت مريخابي وجبهجي (الجبهة الاسلامية القومية ) كنا اقمنا عليك الحد وفي ميدان عام ..... وهسع صاحبنا " النجم " لو ماكان هلالابي كان قلنا ما فيه حاجة كويسة ههههههه ...طبعا امذح .... يعني اعمل حسابك لو بقيت اهلاوي ذي ما قلت حانوديك (رملة العبيد ) ونقيم عليك الحد .

اخونا عباس انتم طبعا فرحانيين جدا بان معكم سيد البلد في الكونفدرالية بس صدقني حتى نحن فرحنا جدا وخاصة بعد القرعة لان حانغلبكم افريقيا للمرة الثانية ذي ما غلبناكم في مجموعة الابطال ندبل لكم " الحنة " في الكونفدرالية وبعدين يا اخونا طبعا حايكون سمعت و فات اضانك تصنيف الاتحاد الافريقي وضع الهلال في التصنيف الاول ب 39 نقطة ومريخك في التصنيف الثاني ب10 نقاط ووضع الهلال الثالث افريقيا بعد الترجي وماذمبي ومريخك لا موقع له من الاعراب يعني كاسات الاغاثة ما محترف بها ولا ذكرت في فهرس الاتحاد الافريقي وطبعا القرعة راعة ظروفكم اوقتكم مع فريق لم يذكر على خارطة افريقيا خالص وترتيبة قبل الاخير في جنوب افريقيا (14) رصيدة من التقاط (25) نقطة والاول (55) نقطة اما سؤالك عن شليف معلومة بسيطة عنه هو بطل الجزائر وانت تعرف الكرة الجزائرية وهو الممثل الوحيد للجزائر للكرة الجزائرية حاليا وصدقني لو كان قالبكم كان هزمكم رائح جاي وماذمبي لم يهزمة على ارضة من 2007 حتى الان غير الهلال السوداني 2/ صفر ادخل لموقع الكاف ستجد المعلومة موجدة وستجد ان نتيجة اللقاين 5/4 ونتيجة المريخ معه 3/1 بعدم تحقيق اي فوز عليه .

اما باماكو المالي مقابل الهلال هو من اخرج انبي المصري وحاليا متصدر الدوري لكن نحن طبعا لا نهاب اي فريق مهما كان ختى لو البرشة نفسه وابشرك البرنس رجع شيلوا شيلتكم هزيمة في الممتاز وهزيمتين في الكونفدرالية شوفوا ليكم حضري من بدري لان اكرم الكبكابة دا ما حيعمل لكم حاجة من هسع بقى يقول عيان مرة عاوزين يجيبوه السعودية ومرة الامارات نحن نيدكم نصيحة لو عنده قيرقان ما حيتعالج لا بكوي تشة من البصير بشة .

لكم التحايا اخواني الاعزاء ونتمنى ان نلتقي دائما وندعوا اخونا الدكتور مرتضى مسجل غياب على طول ارجو يامدثر ان تحركة شوية بس في الرياضة لان في السياسة انت والراكوبة قطعتوا نفسي وبالمناسبة الراكوبة هلالابي كبير وذي ما قال عمنا عبيد بابكر لازم الواحد تكون فيه جاجة سمحة لكم التيحة اخوتي الافاضل .......

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  قريب محمد راجع في السبت مايو 19, 2012 8:13 am



يا جماعة ... إنت يا أخونا (نجم النجوم) غيرت رأيك ... ما قلت .. في الأول ... عاوز (تقلب) أهلي شندي .... ثاني رجعت ليه .... في زول (لاوز ليك) ... ولا شنو ؟؟؟ ....

والله كان أحسن ليك إنت.... وصاحبك عبدالعظيم ... تقلبوا ... أهلي شندي ...

بقول ليك ليه ... لإنو.. المدرب (فيمتو ) ... ناوي (يفركش) .. الهلال ... .... (طفش) ليكم ... هيثم مصطفي ... سيدا (بتاعكم) ...وبعده .. بكري المدينة ... والدور الجاي على ..... مهند الطاهر (بتاعنا) ... والله ما ح يخلي ليكم .. ولا لاعب .... غايتو .... إحتمال يخلي ليكم .... اللاعب جمعة جيناور .. بس ....

وإنتو عارفين ..يا أخوان مدثر وعبدالعظيم .... كل لاعبين الهلال ح يمشوا وين؟ ... ح يمشوا أهلي شندي .. هناك في (صلاح إدريس) ... (مُشرك) ليهم ... ما عدا مهند الطاهر ... ح يجي المريخ (الزعيم) .... عشان كدا أحسن ليكم ... تشجعوا أهلي شندي...

و بالله شوفوا ... يا جماعة ... ناس الهلال ... محظوظين ... وكمان (خرخارين ) ... في أبطال الدوري ... يا أخونا عبدالعظيم ....
ختو الهلال ... ضد ..شليف ...
وختو المريخ ..ضد .. مازمبي ...

ونحن ... ما قلنا حاجة ..... ولا قلنا الهلال محظوظ ... ختوه مع شليف (تصغير شلف) .... يعنى ما تامي شلف ذاتو ....

وكمان في الكنفدرالية :...
ختو الهلال ... ضد ... باماكو المالي ...
وختو المريخ ...ضد ... فريق من جنوب أفريقيا ....

بالله في حظ أحسن من دا ... وكمان (تخرخروا) ....

بالله هي دولة مالي دي ذاتا ... حكومة ما فيها .... خليك من الكورة ... وكمان شوف حظ الهلال الزيادة ... في إحتمال .. مباراة الذهاب والعودة ... ح يلعبوهم في الخرطوم ... لأنو في دولة مالي مافي أمن ولا حكومة .... يعنى الهلال ح يلعب المباراتين في السودان ... شوف الحظ كيف !!!! ...

وفي المقابل .... المريخ ... ح يلعب في آخر الدنيا (جنوب أفريقيا) ... أقصى جنوب الكرة الأرضية ... إنتو عارفين ... بعد جنوب أفريقيا ... مافي أي بلد تاني .. بس المحيط.... وكمان الكورة في جنوب أفريقيا .. أحسن من الكورة في مالي ......

محظوظين !!!!!!! ................. وخرخارين !!!!!! ........................

وبعدين يا أخونا عبد العظيم إنت .. قايل ... الهلال غلب ما زمبي 2/صفر ... ناس مازمبي .... لموا ليكم ... (الشُفع) ... ال بجيبوا الكورة من وراء القون ... والآوت ... ولعبوهم المباراة ..معاكم .... إنتو مصدقين ... إنكم لعبتو ضد مازمبي !!!!

وكمان أقول ليكم حاجة .... يا أخونا عبد العظيم ... اليومين ديل .. عصام الحضري ... في الخرطوم ... أسع تلقاه .... قلب الهلالاب .. يسوي (دق ..دق ... دق ... دق) ..... خايفين .... الحضري يرجع المريخ ....

بس عاوز أقول ليكم حاجة أهم من دا كلو ... في الحقيقة إنتو كلكم ... بما فيكم أخونا عبيد بابكر و الرشيد والدكتور ... معارضة على حكومة ... على هلال ... كلكم... ناس رائعين ... بحييكم ..... وربنا يحميكم ... ويعطيكم العافية .... مع تمنياتي ... للهلال (أهلي شندي فيما بعد) ... وأهلي شندي الأصلي ... والمريخ ... التوفيق ... في دور الـ 16 ... والتأهل لدوري المجموعات ... وفي أمان الله ....

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  عبد العظيم قسم الله في السبت مايو 19, 2012 1:05 pm

اخونا عباس ... صاحب القلم الرائع رغم احمرارة او اصفرارة طبعا طوينا صقحة ماذمبي الذي حصد النقاط رايح جاي (3) نقاط في الذهاب ونقطة في الاياب امام المريخ وهدفين نظفين عكس مبارته معنا تساوينا في النقاط (3) لكل فريق وتاهل علينا بفارق هدف ولم يفوز عليه فريق في مقبرته في الكنغوا غيرنا منذ عام 2007 اما شلييف الجزائري او شلوفة بطل الجزائر فاز علينا بضربات الحظ ولك ان تستغرب في ذلك لان الهلال كبير وحتى الاتحاد الافريقي في موقعة نشر ان مفاجات دور ال 16 هي خروج الهلال السوداني الذي كان من ضمن الرمشحين لنيل البطولة من قبل كل الفنيين لكن ذي مارف مابتدي حريف ..... وذي مابيقولوا "عنتر قتله اعمى " .

وبعدين طبعا معروف ان الفريق المقابل المريخ حمام ميت ويمكن فسيخ كمان ترتيبة ثاني الطيش في دوري جنوب افريقيا عشان كدة اذا غلبتوه 6 / صفر رايح جاي ماتفكرو نفسكم ماذمبي .

اما سؤالك عن الكرة المالية شوف المحترفين في اوربا من ناس "كونتيه " وانت نازل لكن مافي خوف نحن ادها ادود .

وعن افتراحك بان نتحول لاهلي شندي عشان بيتصيد مشاطيب الهلال ما عندنا مانع بس يسموه هلال شندي وبعدين انتم برضوا قاعدين تسجلوا مشاطيبنا ناس الباشا واكرم وكلتشي .... الخ وحتى الضفر البنقطع نرميه مالخليتوه و المدرب ريكاردوا الشطبناه قلعتوا جبتوه عشان كدة احسن تسموا فريكم الهلال الاحمر عشان نشجعكم ...

الاخوة الاعزاء لكم التحية جميعا اسأل الله ان نكون مجتمعين دوما واخوة متحابين .



عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  مدثر القاضي في الأحد مايو 20, 2012 12:06 am


ابدعت واوفيت يا عبد العظيم .. تاني مافي كلام يا قريب .... بس ارجو الراجيكم .
avatar
مدثر القاضي

عدد المساهمات : 91
تاريخ التسجيل : 20/09/2011
العمر : 28
الموقع : m.algady 1001@ yahoo

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: بدون عنوان ......

مُساهمة  قريب محمد راجع في الأحد مايو 20, 2012 8:20 am



خلاص كويس .... أنا قِبلت ... ما دام نجم النجوم قال : تاني ما في كلام .... خلاص يبقى تاني مافي كلام ....

بس في حاجة بســـــــييييييييييطة ... أقولها ليكم يا أخونا عبد العظيم ... مجلس إدارة نادي الهلال (جِنهم) شطب .... السنة الماضية ... ما لقوا لاعب ... يشطبوه ... قاموا شطبوا ... صلاح إدريس .... وصلاح إدريس ... إنتقل إلى أهلي شندي .... و(قعد ) للهلال من هناك ... وأسع .. عاوزين يشطبوا ... البرير ... ويرجعوا صلاح إدريس .... لكن ما لاقين طريقة .......

وكمان في حاجة تانية صغيييييييييرة عاوز أقولها (دقيقة واحدة بس) .... يا أخونا ود القاضي ... أنا ما عارف الراجينا شنو ... لكن برضو ... بنرجاكم ... بس أوعوا ... (تكبوا الزوغة) ... وتقولوا طلعنا الحظ ... بضربات الجزاء ....

خلاص يلا بعد دا ما في كلام (نمط ... نمط) إلى القاء .... وفي أمان الله


قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى