يا عم عبد الله .. الحكاية شَعَر ... ولا شنو !!!

استعرض الموضوع السابق استعرض الموضوع التالي اذهب الى الأسفل

يا عم عبد الله .. الحكاية شَعَر ... ولا شنو !!!

مُساهمة  قريب محمد راجع في الأربعاء أكتوبر 17, 2012 6:37 am

يا عم عبد الله الحكاية شَعَر .. ولا شنو ...

دي طُرفة حقيقة معروفة لبعض الأخوان ... وصارت فيما بعد ... مَثَل ... لحالة الإندهاش واللخمة ... يعنى الواحد يقولها ... عندما يحصل ليهو موقف يكون مندهش وملخوم ...

القصة .... كان جدنا عبد الله كبودي ... (مورود) شديد ... عندو حُمة شديدة ... وقاعد عريان من شدة الحُمة ... وطبعا صدرو مليان شَعَر ... واحد من الأخوان مشى يزورو ... وشاف شعر صدرو كتير ...
وبي (لخمة مخلوطة بي إندهاش وإستغراب ) .. قال : يا عم عبد الله الحكاية شَعَر ولاشنو !! ...

طرفة أخرى قريبة من دي شوية .... ما كتير ....
في مجموعة من ناس واقفين في شارع الزلط ... في الدخينات (بعد الكلاكة) .. منتظرين بص المواصلات ...
... والشمس حارة .... السخانة (تلحم) .....
والشارع ما فيهو أأأأأأأأأأأأأي عربية .... والوقت طول .. والناس عيونهم (زقللو) من شدة النظر لبعيد ....
من ضمن الناس في بنت واقفة ... وجنبها واقف (شافع) ... ماسك (جركانة موية) في يدو ... و(يلولح) فيها فوق وتحت ... قدام البنت ...
بعد شوية ظهرت عربية من بعييييييييييييد ....
واحد من الجماعة ... قال: يهو داك البص جاي ....
البنت الواقفة جنب الولد .. الماسك الجركانه ...
بي لخمة .. قالت : داك ما بص ... داك جركانة ....
طبعا هي قاصدة تقول داك لوري أو أي عربية تانية ....

دي من طرائف وحكاوي .... أخوانا جداً .. عبد الله قورو ...

الرمية الطويلة دي .. قصدت منها ... أنو ... الموقف الحصل للجماعة.. المذكورين أعلاه .... حصل لي أنا برضو ....

أنا كنت في إجازة في السودان .. والله يا جماعة .... السودان غالي ... لكن (غالي) ... المعيشة مرهقة كتير للناس ....

غايتو ... رجعت .. وإندهشت كتير ... عشان .... لقيت المنتدى فاضي ... تقريباً أبوابه مقفلة.... ما في أي حس ولا خبر .... فاضي حتى من المداخلات السياسية (البريئة) .. بين الأخوان الرشيد وعبدالعظيم ....

آخر زيارة للمنتدى كانت يوم 5 سبتمبر .. يعنى قبل شهر وشويتين ... معقولة !!!! ...

المطرب اللبناني .. عاصى الحلاني قال:

وأنا مارق .. مريت ..
جنب أبواب البيت ....
البيت الـ كانوا سُكانو ....
مافي حد لقيت ...
ردوا علي حيطانو ..
قالوا لي ما نسيت ؟
قلت لهم حنيت
لضحكات الـ كانوا ...

معقولة يا جماعة المنتدي .. ما فيهو أي حركة ... ولا أي شئ .... مع أنو ... عندنا الناس الـ بيكتبوا في السياسية ... والدين ..... والإقتصاد ... والرياضة ... والإجتماع ... والشعر ... والثقافة .. وعندنا المؤرخين ... وفي ناس كمان يكتبوا في أي شئ ...

في حين أنو المنتديات الأخرى تعج ... بما لذ وطاب من أصناف الكتابة .... غايتو ....

يا جماعة الحكاية شَعَر ... ولا شنو !!!!!!!


يا أخوانا ما تجوا ... نرجع المنتدى .. تاني ... و(نجوط)... فيهو زي ما عاوزين ... المشكلة وين !!!! ....

ختاماً أهنئ جميع الأهل الأخوان بقرب حلول عيد الأضحى المبارك ... وأقول للحجاج .... حج مبرور وذنب مغفور .. وعودة حميدة ... إن شاء الله .

عاطر تحياتي ... لجميع الأخوان ........ وفي أمان الله ..........


قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يا عم عبد الله .. الحكاية شَعَر ... ولا شنو !!!

مُساهمة  الرشيد نمر في الجمعة أكتوبر 19, 2012 2:24 am

الان عاوز اكتب ركس كتبت تكسى ............. صدق يا ركس ايام الامور مسخنة بينى وصديقى عبد العظيم فى المنتدى السياسى كثير من الاخوان ما عجبهم مداخلتنا ونقاشنا الحار ولقوها فرصة وقالوا نحنا خلينا المنتدى عشانكم انت وعبد العظيم .. طيب الان المنتدى السياسى اصبح صامتا وساكنا كصمت القبور له اكثر من شهرين ... اين هؤلاء من الكتابة وتناول مواضيع الساعة وعلى الاقل الكتابة عن المنطقة او تناول مواضيع اجتماعية سالبة او موجبة لعلاجها والمشاركة حولها .. هل تصدق ان ابنتى شيماء تود الدخول فى المنتدى لتدلو بدلوها فى بعض المواضيع ولكنها للاسف لاتعرف الكتابة بالعربى وتناول مواضيعها يكون عبر اللغة الانجليزية فهى عندها موضوع وعرضته على عن اثر تربية وتنشئة الاطفال فى السعودية .. وقد دافعت بشدة عن عن تربية وتنشئة الاطفال فى الخليج وخاصة فى السعودية بحقائق واضحة .............
ما نود ان نقوله علينا وعليكم بالمشاركة وعكس هموم ومعالجات منطقتنا عبر هذه الوسيلة الاعلامية الراقية حتى نظل متكاتفين وعلى قلب خط واضح وطريق مستنير المعالم واشكر اخى ركس الذى رمى بحجر فى بركة ساكنة وهو صاحب دعابة وسيظل فاكهة هذا المنتدى ... ودمتم ...

الرشيد نمر

عدد المساهمات : 201
تاريخ التسجيل : 22/05/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد قريب

مُساهمة  عبد الرحمن محمد على خليفة في السبت أكتوبر 20, 2012 8:09 pm

حلوة قصة الجركانه دي طبعا قورو ملك النكته في الشرقية ،،،،،،،
فعلا المنتدي هجر من الكثرين ولكن إنشاء الله نتواصل معكم وتحياتي لشيماء نمر ولابيها الرشيد ...يا رشيد اكيد شوقتنا لمعرفة راى شيماء في التعليم في الخليج وكيف لاتسطيع الكتابه بالعربي وهى في السعودية ؟ غدا نواصل ....السلام عليكم

عبد الرحمن محمد على خليفة

عدد المساهمات : 14
تاريخ التسجيل : 02/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يا عم عبد الله .. الحكاية شَعَر ... ولا شنو !!!

مُساهمة  قريب محمد راجع في الأحد أكتوبر 21, 2012 8:53 am

أخونا الرشيد ... تكسي حياتك .... وحياة بنتك شيماء الصحة والعافية .... وكمان إن شاء الله ... تغطي كسوة العافية ... العم عبد القادر والوالدة .. وجميع الأخوان ... وكل سنة وإنتو طيبين ...

والله يا أخونا الرشيد ... أنا كنت شايف النقاش السياسي بينك وبين الأخوان عبدالعظيم وعوض ... (وأنا أحياناً) ... كان شيق ومفيد .. رغم السخونة و (العكاكيز) الكان شغالة ... وكان معطي المنتدى نكهة خاصة ....

موضوع الأمورة شيماء ..... من المواضيع التي تثير إهتمام ... عبد الرحمن محمد علي خليفة (عبود) ... وتشغل بالو ... عشان كدا متشوق يعرف رأيها ... وأنا كمان ...

وزي ما إنت قلت : أنا (رميت حجر في بركة ساكنة) ... بقوليك إنت كمان .... (ضربت على وتر حساس) ... بالنسبة لعبود .. بموضوع شيماء ...

يا ريت يا أخونا الرشيد ... تقول لينا رأيها .. عشان نشارك كلنا معها في الموضوع ... وتكون حجر كبير ... يحرك البركة الساكنة ....

عبارة .... (حجر في بركة ساكنة) ... تعبير بليغ ... وإنت وعبود ما قصرتو ا برضو رميتوا ... غايتو عبود .. رمي ليهو ... (دُرابة)....

وبمناسبة البركة ... والبحر ... وكدا ....

قالوا السنة دي ... البحر (بحر فوق) ... كان قررررررررررررب ... يغرق الدوم ... و لو ما ... زلط (البشير) ... كان الدوم غرق ... (الكلام دا يزعل الرشيد) .... غايتو أنا عندي أرض هناك غرقت ..... (شرق الزلط) ...

أخونا /جعفر العوض .. الأيام دي في الدوم .....
قال: اليومين ديل ... بعد ما رجع البحر .... رقد جنس سمك ... خصوصاً (الكُور )... حايم في (رملة العبيد) .. ساكت .....

طبعاً اللحمة اليومين ديل غالية جداً ... وما في كمان (الكلام دا يبسط الرشيد) ....

قالوا .... ناس الدوم ... اليومين ديل ... يعملوا الملاح بالسمك ... (بالكُور) ....

بعدين السمك وبالذات (الكور )... عندو ميزتين ... مجاني .... وكمان يفرك ... الملوخية والويكة اللينة ... براه ...

يختوا الملوخية في النار .. يرموا (الكور ) حي .... (يفطفط)... جو حلة الملوخية .... لغاية ما يموت ... ويستوي ... وتكون الملوخية ... إتفركت ....

غايتو حريم الدوم اليومين ديل ضاربات الراحة .... ساكت ...

الكلام دا على ذمة ..... أخونا / عبد الله قورو ... إحتمال يكون ... أدها كوز... من راسو ... ساكت ....


ربنا يديم الخير والبركة .... وفي أمان الله

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى