طلعنا من المولد ....... بدون حمص .........

اذهب الى الأسفل

طلعنا من المولد ....... بدون حمص .........

مُساهمة  قريب محمد راجع في الإثنين نوفمبر 26, 2012 5:25 am

دا مثل مصري معروف ... لانو فى مصر من مظاهر الاحتفال بالمولد النبوي الشريف ... بيع
الحمص والحلويات .. و أى شخص يمشي للمولد لازم يشتري حمص لأنه متوفر بكثرة .... ودا شئ أساسى في المولد .....

وأي واحد ما يشتري حمص في المولد ..... يكون طلع من المولد بدون حمص ..... وهو مثل يقال للشخص إذا طلع من موضوع ما بدون أن يحصل على شئ ... زي المثل العربي (رجع بخفي حُنين ) ....

زمااااااان ..... أنا ... وأخونا المرحوم علي فضولي الحسن كبودي (الله يرحمه) .... جينا من البلد للخرطوم ... جُداد لنج .... قررنا نتعلم ... نسوق العجلة ... ومشينا أجرنا عجلات ....

وكل واحد فينا أنا والمرحوم ... سايق عجلة .... سواقة بتاعت ناس ما بتعرف تسوق عجلة .... وفي شارع فااااااضي ..... ما فيهو غير ..... كلب .... كان نايم في طرف الشارع هناااااك .... أنا كنت شايف الكلب .. لكن الكلب عمل لي ربكة (ملاوزة) .... مع أنو نايم ... وباللخمة .... (توش) .. دخلت بالعجلة في الكلب .... ويلا ... (الدحفسيبة)... وقعت ..

قميصي إتقطع ... وكلب خربشني ... والعجلة خربت .... والكلب ذاتو ... رجلو إنكسرت ... غايتو .. كان منظر ... (مضحك ... ومحزن في آن واحد) ....

أخونا المرحوم علي فضولي ... شاف المنظر .. وسايق العجلة ... ويعاين لي ... ويضحك .... ومُقبل للوراء ... وما شايف قدامو ... ويضحك ... طلع من الشارع .... ويضحك ... وتوش ... دخل في (الكوشة ) ... هو والعجلة .. وسط الزبالة ....

ضرب كُراعو ... والعجلة (إتفتلت )... وقميصو بقا أسوااااااد بالزبالة ... وكان شكلو مضحك .... أكثر من منى بكتير....

وأنا واقع ... رفعت رأسي .. وشفت المنظر ... رغم إني متألم .... وضحكت .... كتيييييييير ....

وقلت بالله شوف ... (أبو سنة يضحك .. على أبو سنة) ... نحن الإثنين ما بنعرف نسوق العجلة ... ونضحك على بعض .... بس ضحك برئ ....

المقدمة الطويلة دي بس عشان ... أقرب ليكم الصورة ..... صورة ناس الهلال .... وناس المريخ .....

عندما طار المريخ .... من كأس الكنفدرالية .... وإتغلب من الفريق الكنغولي .... ناس الهلال ... بدل ما يقولوا ... لناس المريخ .... (هارد لك) .... وخيرها في غيرها ..... فرحوا ...فرح .... وحاموا في الشوارع ....

وناس المريخ ... زعلوا شديد ... زعلوا مرتين .... مرة ... لأنو المريخ طار .. من البطولة ... ومرة لأنو ناس الهلال ..شمتوا فيهم ....

عشان كدا ناس المريخ .... عندما طار الهلال ..... بدل ما يقولوا لناس الهلال ... (هارد لك ) .... فرحوا جنس فرح .... فرح بتاع ناس زعلانين ... والله لو كان ... المريخ إتأهل للنهائي ..... ما كان فرحوا ... زي الفرح دا .......

واحد من الأخوان ال معنا في الدمام (السعودية) ... كان في إجازة في السودان ... أيام مباريات الهلال والمريخ ... لكن ما عندو أي قضية بالكورة .... ولا بيعرف أي حاجة في الكورة ... لو قلت ليهو .. جمعة جنارو يلعب وين .... يقول ليك ... يعلب مهاجم في أهلي مدني ....

أخونا .... في يوم مباراة الهلال ... بس سمع أنو الهلال اليوم ح يلعب في مالي .... بعد نهاية المباراة ...

أخونا ..... شاف الشوارع مليانة ... بالناس ... فرحانين .... ويهتفوا ...

وهو كمان .. قام طلع معاهم .... يبارك ليهم ..... لأنهم فرحانين ...

أول .... ما قال للجماعة الفرحانين ديل ... مبروك ياجماعة .. فوز الهلال .... الجماعة .... إتلموا عليهو ... وعاوزين .... يضربوهو ....

قال ليهم : الله ... في شنو ... يا جماعة .... أنا قلت أبارك ليكم ... عشان أنتو فرحانين بفوز الهلال .... مش الهلال فاز ..ولا الحكاية شنو !!!! ....

واحد من الجماعة العاقلين .... قال ليهو : الناس الفرحانين ديل .... ما ناس الهلال ..... ديل ناس المريخ ... فرحانين عشان الهلال إتغلب من الفريق المالي .... وطار من البطولة ....

أخونا قال: يعنى أسع الناس المريخ ديل فرحانين عشان الهلال اتغلب ... معقولة سوداني يفرح عشان فريق سوداني طار من البطولة !!!!

واحد تاني من الجماعة قال ليهو : إنت ما عارف ... ناس الهلال أمبارح .... كانوا عاملين (بارتي ) .. عشان المريخ طار ....

معقولة .... يا جماعة .... أنا عارف ناس الهلال وناس المريخ ... متعصبين .. لكن ما للدرجة دي ....

أخونا عبد الله قورو ... قال لي .. المريخ فرصتو كانت كبيرة .... والله لوكان ... في محل المريخ ... فريق جزيرة الفيل .. كان إتأهل ....

قلت ليهو : يا أخي ... حرام عليك .... المريخ بدأ المباراة الثانية ... وهو مغلوب ... لكن الهلال كان متقدم حتى الدقيقة 80 من المباراة الثانية ... يعنى باقي ليهو 10 دقائق بس .... ويتأهل ... (خليك من ضربات الجزاء) .... بمعنى أنو فرصتو كانت أكبر .....

عموماً .... أنو ... الفريقين طلعوا من المولد بدون حمص .... مولد ... المحص كان فيهو كتير .. ورخيص .. صعب إنو يتكرر ....

غايتو ... نحن في المريخ ... عندنا (حمص) ... قديم مستورد ..... جبناه من سنة 89 (كأس مانديلا) .... كلما تغلبنا الحيلة ... نقزقز منو ...

وناس الهلال برضو عندهم (تسالي ) ... محلي (كأس الدوري) ... جابوه من سوق ليبيا .... مبروك عليهم ..... وإن شاء الله المرة القادمة ... يجيبوا حمص مستود من بره .. (كأس أفريقيا) ...

ختاماً هار دلك للهلال والمريخ ... ولجماهير الهلال والمريخ .... وإن شاء الله ... يتوفق الفريقين في بطولات أخرى ... أهم شئ الروح الرياضية ... وعدم التعصب ....

الرحمة والمغفرة .. للمرحوم علي فضولي ... وإن شاء الله في جنات الخلد ... والتحية والسلام لجميع الأخوان ....

في أمان الله ............

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: طلعنا من المولد ....... بدون حمص .........

مُساهمة  عبد العظيم قسم الله في الثلاثاء ديسمبر 11, 2012 5:26 am

اخي الظريف والمريخابي ابو دم خفيف لك التحية وانت تنثر الدرر في ارجاء المنتدي .... ورحم الله علي قضولي ورغم اننا لم نحضر عهده ولكن حضرنا عبد الله فضولي رحمة الله عليه كان صاحب طرفة وذوق عالي والكل يحبه والان محمد فضولي اطال الله عمرة ويعطيه الصحة والفافية الكل يحبه .... اما موضوع خروج المريخ والهلال ذكرت المريخ اولا ليس تقديرا له ولكن لانه دائما يخرج اولا ولكن سيد البلد دائما تخرجة ضربات الحظ التي دائما تعبث في وجهه اخرجته من الابطال واخرجته من الكنفدرالية .... وبعدين حكاية الفرح لخروج سيد البلد صاحبك قرشي وزع 250 علبة بيبسي فرحا وجماعة المريريخ يشجعوا دائما الفريق الذي يلعب ضد الهلال اكثر من تشجيعهم للمريخ ... وبعدين شنو حكاية حمص الكثيرة الذاكرها في الموضوع دي انت ماعارف نحن عندنا حساسية منها ومين قال لك نحن ماعندنا حمص نحن عندنا حمص اصلي مصري ومن الاسماعيلي كمان اسال منه المعز .

اخي صحي خرجنا صفر اليدين عشان ما اجيب سيرت الحمص وذي ما بيقولوا التم المتعوس على خايب الرجاء والله يعين شكلة كدة القادم اسوى لان الهلال والمريخ بيقوا يجيبوا محترفين من السنترليق الافريقي حتى سادمبا وسكواها ما قدروا يدفعوا لهم ... الله يجيب الغواقب سليمة ... في رعاية الله

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: طلعنا من المولد ....... بدون حمص .........

مُساهمة  قريب محمد راجع في السبت ديسمبر 15, 2012 7:45 am

يا سلام هو دا الفرح ... ولا بلاش .... 250 علبة مرة واحدة .... تحية كبيرة ... لأخونا في (المريخ)... قرشي عبد الرحمن ود حسين ....

والله يا أخونا عبد العظيم الظاهر ... أنو أخونا في (المريخ) .... قرشي من شدة الفرح (من الزغل )... وزع الببسى دا كلو....

لكن يا أخونا عبد العظيم .... بينى وبينك ...... لو حسبنا .... 250 علبة ببسي × ريال ونصف .... تساوي 375 ريال .... بالسوداني تساوي تقريباً 700 ألف ... يعنى قررررررربت تتم المليون ....

أسع ... يا أخونا عبد العظيم ما تهمس في أذن .... أخونا قرشى ... تقول ليهو ... لو رسلت المبلغ دا ... للدوم .... ما كان أحسن .....

نتم عليهو شوية كم مليون ... كان بيعمل ... إستاد الدوم .... بعد داك إن شاء الله يسميهو ... إستاد (جوليبا) بالدوم ... ولا أي إسم تاني ... ما مشكلة ....

كسرة (أخونا محمد حسن الرعيابي) ..... سمعنا .. بي تحت تحت أنو المريخ ناوي .... يسجل ... الثنائي (البرنس وفييرا) .... وسادمبا كمان.... بالإضافة إلى عنكبه .... وطبعاً .. بوجود الحضري ... يكون على كدا ... المريخ ... ح يكون ... برشلونة عدييييييييييييييل ....


تحية كبيرة ... ليك ... يا أخونا عبدالعظيم .... وربنا يعطيك العافية ..... وتحية كبيرة برضو لأخونا قرشى ال وزع الببسى .... وتحية أكبر ... لجميع الهلالاب ال في جدة ... ال شربوا ... الببسى حقنا .... ال وزعوا .... أخونا (المريخ) .. قرشي .... من شدة الفرح (من الزعل) .....

تحياتي للجميع .... وفي أمان الله .......

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى