الى منتدى جديد

اذهب الى الأسفل

الى منتدى جديد

مُساهمة  احمد ادريس عبيدون في الأحد يناير 20, 2013 6:25 am

اخوتي اعضاء منتديات الدوم واخوتي الزوار جميعا - السلام عليكم ورحمة الله وبركاته

بدأت منتديات الدوم كأنها مفاجئة لكن اندفع نحوها ابناء الدوم مما يدل على انهم كانوا فعلا بحاجة الى منتديات تجمعهم باسم قريتهم، وفي فترة وجيزة امتلأت الساحة نشاطا والنفوس طربا وفرحا .. فرحنا انه صار لقريتنا الحبيبة اسم اسفيري نراه ويراه غيرنا ونعكس فيه نشاطاتنا حيثما كنا لأنه يقرب المسافات بين المغترب والمهاجر وابن البلد ويزيدنا تعارفا ببعضنا. وقد ازداد فخرنا حقا عندما امّ منتدانا اخوة من خارج القرية اما زوارا او اعضاء . فقرية الدوم تستحق منتدى يضاهي قيمتها ونحن قادرون على خلقه..
لقد كان هناك اجتماع في مسيد المرحوم شبيل ايام عيد الاضحى المبارك حضره كثير من الأهل كان فيهم عدد كبير من اعضاء قروب الدوم في الفيس وهم ليسوا اعضاء في المنتدى، سمعوا ما دار من نقاش. لقد اتفق المجتمعون على احياء المنتدى وتنشيطه و تعهدنا بأن نسعى لاعادة العضوية للمنتدى، ورأينا ان ذلك ممكن نظريا ولكن عمليا قد تعيقه بعض العوائق تسببت في عزوف الناس عن المنتدى اذا ازلناها نجحنا ونلخصها في الاتي:
1- من التقصير الواضح للعضوية - رغم نشاطها في المنتدى-انها كانت لا تعلق على مواضيع هامة جدا وهي المناسبات الاجتماعية. فمثلا بعض الاخوة يبشرون بزواج او فرح لواحد من الأهل وعندما تمر على الموضوع تجد ان الكثيرين قد قرأوه ولكن لا أحد يعلق .. كذلك الحال في النعي فقد ينعي احد الاعضاء شخصا عليه رحمة الله ولا تجد شخصا يترحم عليه رغم كثرة من قرأ الموضوع .. يتكرر نفس الشيء في الترحيب بالاعضاء الجدد مما يجعل الناس تكسل عن المواصلة .. انا اعرف احد ابناء المنتدى كان نشطا جدا جدا وتوفت والدته عليها رحمة الله وتم نشر خبر وفاتها في المنتدى ولم يترحم عليها الناس فخرج الاخ من المنتدى دون رجعة . هذا في العموم.
2- كما انني لاحظت من البعض - هداهم الله - بعض الردود والتعليقات المستفزة او الغمز واللمز وشخصنة الاشياء مما ايضا يؤثر في عدم رغبة البعض في الاستمرار.
3- كما تم ملاحظة التكتل، حيث يتجاوب البعض مع مجموعة دون بقية اعضاء المنتدى.
4- علينا ان نبدأ بداية جادة ونتواثق ان يستمر المنتدى نظيفا معافى حبيبا لكل النفوس وان تكون فيه الجدية واحترام الرأى والرأي الآخر وقبول الآخرين والمخاطبة بحكمة فنرفع من شأن المنتدى ومن خلاله القرية. وحيث أن هذا المنتدى يحمل اسم القرية فمن المحبذ ان يكون مرتبطا بها ويعكس اصالة وتاريخ وتنمية وجمال القرية وسماحة اهلها والتقريب بين كل من ينتمى اليها ثم بين اهلها وبقية الجيران ..
5- لا اري هناك ما يمنع التركيز على شخصيات في القرية وتاريخها لربط ابنائنا بأهلهم و قريتهم وماضي تاريخهم وذكريات عن ذلك الماضي ولدينا كثير من الاساتذة المقتدرين على ذلك وقد بدأوا مواضيع اجتماعية جادة ولكنها توقفت لأسباب.
6- اما كون الأخوة يفضلون الفيس على المنتدى فقد يرى الشخص انه في الفيس يلاقي اخوته يوميا، وثانيا الكتابة في الفيس تكفيها اجابات مختصرة و مواضيع قصيرة خفيفة الظل تجذب المشارك ولكن يفتقد الفيس للمواضيع الجادة لأنها لا تنافس المواضيع الخفيفة .. نحن نعد كل العضوية ان نوفر لهم في المنتدى المواضيع الخفيفة الى جانب المواضيع الجادة وذلك باختيارهم لما يروقهم .

تعالوا اخوتي نبدأ المنتدى على هذا التصور او اعطوا تصوراتكم قبل ان نبدأ.. وحتى لا نعود بعد فترة من حيث بدأنا...مع كل الامنيات الطيبة لمنتدى طيب يجمع الناس في كل بقاع الارض في صفحة واحدة والله من وراء القصد


عدل سابقا من قبل احمد ادريس عبيدون في الأربعاء يناير 23, 2013 6:36 am عدل 2 مرات

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  قريب محمد راجع في الإثنين يناير 21, 2013 5:26 am



والله في الحقيقة .... يا أبو محمد ... إنت ... زي هيثم مصطفي (سيدا) .... لمن يزل الملعب (المنتدى) ..... يحرك كل الملعب ... والجمهور كمان .... يمرر أجمل التمريرات ...

أسع الموضوع دا .. باص معلم ... (باص قون) ... بس منتظر ... من الأخوان يهدفوا .....

أتصور .... حسب تصوري ... أن نتواصل في المنتدى على هذا ..التصور .... تصور عقلاني وصحيح ... على الأقل .... في تصوري أنا ... وأوافق .. بقوة على ذلك ....

مع العلم بأنه ... أنا ح أقبل .. بأي تصور آخر .. من الأخوان ... مادام ... هذا التصور ... في النهاية ... يهدف إلى ... مد جسور التواصل والإلفة والمحبة .... بين الأخوان والأهل ...

سلام .. كتير كبير .... لك يا أخونا أحمد إدريس ..... ربنا يخليك .... و يمتعك بالصحة والعافية .......... وتحية كتير كبيرة ... لجميع الأخوان ... والأهل ....

يعيش ....يعيش الدوم ..

في أمان الله

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  احمد ادريس عبيدون في الثلاثاء يناير 22, 2013 12:27 am

قريب محمد راجع كتب:

والله في الحقيقة .... يا أبو محمد ... إنت ... زي هيثم مصطفي (سيدا) .... لمن يزل الملعب (المنتدى) ..... يحرك كل الملعب ... والجمهور كمان .... يمرر أجمل التمريرات ...

أسع الموضوع دا .. باص معلم ... (باص قون) ... بس منتظر ... من الأخوان يهدفوا .....

أتصور .... حسب تصوري ... أن نتواصل في المنتدى على هذا ..التصور .... تصور عقلاني وصحيح ... على الأقل .... في تصوري أنا ... وأوافق .. بقوة على ذلك ....

مع العلم بأنه ... أنا ح أقبل .. بأي تصور آخر .. من الأخوان ... مادام ... هذا التصور ... في النهاية ... يهدف إلى ... مد جسور التواصل والإلفة والمحبة .... بين الأخوان والأهل ...

سلام .. كتير كبير .... لك يا أخونا أحمد إدريس ..... ربنا يخليك .... و يمتعك بالصحة والعافية .......... وتحية كتير كبيرة ... لجميع الأخوان ... والأهل ....

يعيش ....يعيش الدوم ..

في أمان الله
شكرا عباس لمبادرتك على المبادأة .. التصور قطعا مجرد طرح للناس للاتيان بما هو افضل والا فعلى الاقل نتحرك في هذا الاطار .. والمطلوب من كل ذلك هو تحريك المنتدى وبصورة جاذبة .. احط خطين تحت جاذبة دي (يا دوب قدرت اخط خط واحد) .. حنجرب بجدية وهمة وطول نفس وبالتزام لكن دون الزام .. انتظر رأي الاخوان المواظبين وغيرهم و بعده سابدأ في الاتصال بالعضوية الغائبة للالتحاق بمعسكر فريق المنتدى ما دام جبت سيرة( سيدا ).. الله يديك العافية

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  بثينة محمد سعيد في الثلاثاء يناير 22, 2013 3:02 pm

شيخ أحمدون ..
لك التحية . ..والتحية لكل أهلي وأرحامي من ناس الدوم وين ما كانوا..كلامك صحيح وموضوعي ..وفي تكتلات واضحه بس ياريت الناس تتجاوز وتمشي للأمام

وبالجد في ناس كتاباتهم موضوعية وهادفة والواحد لما ما يلقى تجاوب "بأذن في مالطة"..وفي كسل وحالة فتور ربنا يشفي الجميع
سلام خاص ل"عباس ود نورة بت آمنة"

بثينة محمد سعيد

عدد المساهمات : 104
تاريخ التسجيل : 29/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  قريب محمد راجع في الأربعاء يناير 23, 2013 5:10 am

يعنى أيه تكتلات ؟؟؟ .... في شنو؟؟

إحتمال تكون في تكتلات .... لكن والله في الحقيقة ... وبصراحة ... أنا ما شعرت .. ولا لاحظت .... أنو هناك تكتلات.... ولا عندي هذا الإحساس من أساسو ...

خلونا نمشى بي كلام الشاعر العباسي .. بشارد بن برد بقول :

اذا كنت في كل الامور معاتبا ...................................... صديقك لم تلق الذي تعاتبه
فعش واحدا أو صل اخاك فإنه ...................................... مقارف ذنب تارة ومجانبه
اذا انت لم تشرب مرارا على القذى ............................. ظمئت واي الناس تصفو مشاربه

بشار بن برد .. يقول لينا ... يا أخوانا ... ما تكونوا ..(حساسين) كتير ..... وما (تحبكوا) ... الشغلانة ... بتاعت اللوم والعتاب كتير ...... ومش دائما أخوك .. (يبرد قلبك) ... و أحياناً أخول .. يحسن الفعل .. وأحياناً يسئ الفعل... ولو عاوز أخو .... بدون عيب ... ح تعيش براك ........

يعنى مثلاً ..... إذا ... أي واحد .. ما وجد التجاوب المطلوب على موضوع ... أو المجاملة المطلوبة ... يجب أن ينظر ... لعدم المشاركة ... من زاوية تانية .... ويلتمس له العذر :-

- بالنسبة لأي شخص ما جامل في (عزاء أو فرح) .... إحتمال يكون مشغول ... أو مسافر ... أو الإنترنت مقطوع ... أو أي سبب آخر ....

- بالنسبة لي شخص ما تجاوب مع موضوع مهم (ثقافي أو سياسي أو إجتماعى أو رياضي أو دينى) .... إحتمال يكون ...ما بيعرف ..... ولا بيفهم .. في الموضوع ... يعلق يقول شنو... يقرأ ... وبس .

عموماً ... أسع أحسن حاجة ... خلونا ... ننسى حكاية التكتلات دي ..... زي ما قال المعلم .. شيخ أحمدون (بتعبير جميل) ... خلونا نبدأ نواصل في المنتدى .. بصورة جاذبة .. وبي إلتزام ... من غير إلزام .....

كسرة صغييرة :

والله يا أخونا أحمد إدريس .. أنا قاعد ساعة ... عشان .... أعمل خطين تحت كلمة (جاذبة) ... ما قدرت ... إنت خط واحد ذاتو ..عملتو كيف ...

سلام ..... كبير ... قدر الكون .... للأخت / بثينة ... تحية كبيرة قدر الكون ... برضو..... لشيخ أحمدون .... ودعوة كبيرة ... أكبر من الكون ... لجميع الأخوان ... للمشاركة ....

وفي أمان الله

قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  عبد العظيم قسم الله في الإثنين يناير 28, 2013 5:13 am

كغير العادة ابداء تعليقي بغير صاحب المقال لان كلام اخونا عباس حرقني اكثر من (بليلة الحرنينة ) ما قادر اصبر عليه واولا : ما عارفك زعلان من احمد ادريس ليه تشبه بالما يسمى بهيثم الملطشة الخائن للعهود (عشرة سبعة عشر ) سنة ..... الحاجة الثانية بصاصات هيثم بقت مكشوفة وماسخة ...ثالثا هيثم عجوز واستاذنا احمد لسة شباب.... رابعا ابو محمد لم يغير ولا يبدل بينما (هيثومي ) بقى يكسر ثلج للعجب عشان يخيشة في النهاية ونحن الحمدلله ماعندنا عجب ولا رجب :

اعود لاستاذنا الجليل احمد ادريس الذي صدق ما وعدنا به في كرقة (شبيل ) والذي وضع يده على الجرح مباشرة رغم اني اختلف معه في بعض التحليل ولكن على كل حال اذا تجنبنا كل ما قاله من معوقات سنضمن منتدى معافى وسيعود افضل من سيرته الاولى وياليت ان يعود الصفاء بيننا كاسرة واحدة ويجتمع شملنا ونتمنى ان ننهض بالمنتدى من جديد وبصورة جميلة ومفيدة وخاصة بين ظهرانينا استاذة ودكاترة كثر نتوقع ان يقدموا الكثير والمفيد لشبابنا والتحية للموصلة للاخت بثينة صاحبة القلم النسائي النشط ونتمنى ان تقتدي بها كل نساء الدوم .

مذكرة : وجدت كثيرا من الاخوان والاخوات طلبوا المشاركة والتسجيل في المنتدى ونشطت لهم الطلب وتم قبول كل الطلبات من دون استثناء وسيصلهم رد على اميلاتهم اتمنى ان يشاركوا وينزلوا مشاركاتهم حتى نتواصل جميعنا .

عبد العظيم قسم الله
Admin

عدد المساهمات : 298
تاريخ التسجيل : 13/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

العود احمد

مُساهمة  عبد الرحمن محمد على خليفة في الثلاثاء يناير 29, 2013 3:14 pm

العود احمد
وهذا احمدعبيدون يطل علينا من احد قمم الدوم الخالدة كرقة شبيل له ولابنه صلاح الرحمة ولجميع موتا المسلمين.بعد طول انتظار ,وصدق في ما ذهب اليه من ملاحظات وان كانت الملاحظة الخامسة هي الاهم وهي مربط الفرس لان هذا هو منتدي الدوم وهو معني بها وليس بالسودان ومشاكله لاننا لا نستطيع حل مشاكل البلد ولكن ممكن نحل مشاكل الدوم واعني ذلك الابتعاد عن السياسة والكورة .مع الشكر للرشيد وعبد العظيم وعباس وجهودهم الواضحة في المجالين .
ولي عودة انشاء الله

عبد الرحمن محمد على خليفة

عدد المساهمات : 14
تاريخ التسجيل : 02/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  احمد ادريس عبيدون في الأربعاء يناير 30, 2013 1:51 am

بثينة محمد سعيد كتب:شيخ أحمدون ..
لك التحية . ..والتحية لكل أهلي وأرحامي من ناس الدوم وين ما كانوا..كلامك صحيح وموضوعي ..وفي تكتلات واضحه بس ياريت الناس تتجاوز وتمشي للأمام

وبالجد في ناس كتاباتهم موضوعية وهادفة والواحد لما ما يلقى تجاوب "بأذن في مالطة"..وفي كسل وحالة فتور ربنا يشفي الجميع
سلام خاص ل"عباس ود نورة بت آمنة"
اختنا بثينة الله يديكي العافية وشكرا على المداخلة الطيبة .. نحن حنقول عفى الله عما سلف ونترك الكسل و نقول بسم الله ونواصل بحيوية وانا متأكد الناس جاية جاية وكمان بروح طيبة واشكر كل من استجاب لدعوة التجديد وجهز نفسوا وجايينا.. نسأل الله التوفيق وكلامك الفي الفيس جميل بس محلو هنا..

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  احمد ادريس عبيدون في الأربعاء يناير 30, 2013 1:59 am

عبد العظيم قسم الله كتب:كغير العادة ابداء تعليقي بغير صاحب المقال لان كلام اخونا عباس حرقني اكثر من (بليلة الحرنينة ) ما قادر اصبر عليه واولا : ما عارفك زعلان من احمد ادريس ليه تشبه بالما يسمى بهيثم الملطشة الخائن للعهود (عشرة سبعة عشر ) سنة ..... الحاجة الثانية بصاصات هيثم بقت مكشوفة وماسخة ...ثالثا هيثم عجوز واستاذنا احمد لسة شباب.... رابعا ابو محمد لم يغير ولا يبدل بينما (هيثومي ) بقى يكسر ثلج للعجب عشان يخيشة في النهاية ونحن الحمدلله ماعندنا عجب ولا رجب :

اعود لاستاذنا الجليل احمد ادريس الذي صدق ما وعدنا به في كرقة (شبيل ) والذي وضع يده على الجرح مباشرة رغم اني اختلف معه في بعض التحليل ولكن على كل حال اذا تجنبنا كل ما قاله من معوقات سنضمن منتدى معافى وسيعود افضل من سيرته الاولى وياليت ان يعود الصفاء بيننا كاسرة واحدة ويجتمع شملنا ونتمنى ان ننهض بالمنتدى من جديد وبصورة جميلة ومفيدة وخاصة بين ظهرانينا استاذة ودكاترة كثر نتوقع ان يقدموا الكثير والمفيد لشبابنا والتحية للموصلة للاخت بثينة صاحبة القلم النسائي النشط ونتمنى ان تقتدي بها كل نساء الدوم .

مذكرة : وجدت كثيرا من الاخوان والاخوات طلبوا المشاركة والتسجيل في المنتدى ونشطت لهم الطلب وتم قبول كل الطلبات من دون استثناء وسيصلهم رد على اميلاتهم اتمنى ان يشاركوا وينزلوا مشاركاتهم حتى نتواصل جميعنا .

عبد العظيم الريّس .. دا اسم ليك جديد سمعته مع ان التسمية دي مكررة من زمن النميري مرورا بود رحمة وها انت تصبح ريس .. خلاص ريس ريس ما عندنا مانع بس الكتار يغرقوا مركب وعاوزنهم يغرقوا منتدانا دا بالمشاركات ان شاء الله. و اشكرك على مرورك رغم انك جيت متأخر شوية بصفتك زول مسئول واذا المدير اتأخر كلنا قاعدين نتأخر في الشغل .. اختلافك معي في التحليل لن نقف عنده لأن ما نتفق حولة اكثر مما نختلف عليه ولذلك علينا ان نبدأ و ما عاوزين الهمة تهبط بعدما جينا بالتزام لكنه غير ملزم اذا الناس ما وقفت معانا.. الله يديك العافية و يوفق الجميع في هذا المنتدى الذي نريد ان نجعل منه بوابة مذهبة لقريتنا الحبيبة والا فلا فائدة من وجع الاصابع ..

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  احمد ادريس عبيدون في الأربعاء يناير 30, 2013 2:08 am

عبد الرحمن محمد على خليفة كتب:العود احمد
وهذا احمدعبيدون يطل علينا من احد قمم الدوم الخالدة كرقة شبيل له ولابنه صلاح الرحمة ولجميع موتا المسلمين.بعد طول انتظار ,وصدق في ما ذهب اليه من ملاحظات وان كانت الملاحظة الخامسة هي الاهم وهي مربط الفرس لان هذا هو منتدي الدوم وهو معني بها وليس بالسودان ومشاكله لاننا لا نستطيع حل مشاكل البلد ولكن ممكن نحل مشاكل الدوم واعني ذلك الابتعاد عن السياسة والكورة .مع الشكر للرشيد وعبد العظيم وعباس وجهودهم الواضحة في المجالين .
ولي عودة انشاء الله
والله يا عبود يا ود خالي .. العود عبد الرحمن ههها .. ياخي اول بادرة نجاح لمبادرتنا هي ظهور ناس المهجر الاهجر مننا ديل ودا شيء مشجع خالص والجابك يجيب عقابك .. ناس احمد عمدة امريكا وصلاح يوسف وابراهيم والدكتور عبد الرحيم .. عموما انا وراهم كلهم لغاية ما يجونا ان شاء الله .. نعم اخي الحبيب فان الدوم هو محور الاهتمام وركيزة النشاط .. والدوم اصلو دم ساكن العروق يرويها و بال(واو) اصبح الدم دوم ارض نفديها.. اقول ليك؟؟ هاك القصيدة كلها :

اصل الدوم

الدوم اصلو دم ساكن العروق يرويها
وبالواو اصبح ( الدم دوم ) بلـد نفديها

الدوم حب روايتو مع الزمن نرويها
الدوم فخرنا وعـز القبيلــة وتيهــا

الناس تــارث الدنيا و تكــوس حاليها
ونحـن نــــورّث الناس الفِطــن نديها

الدوم ما بنية حليوة زول غاويهــــــا
ولا قطعـة ارض بندور نفاخـــر بيهـا

الدوم ديمـة دايم عزّو في كل جيهة
شقيـــش ما تقبــــل عــزتو تلاقيها

الدوم ماهو دار نصبح نمسِّي عليها
الدوم دار بتسكن في القلوب تحميها

لا تلوموني لو يوماتـي غنيت ليهــا
قالوا الجمرة يا ناس تحرق الواطيهـا

الدوم ســـاو عمايـل فينا بنعانيهـــا
يا حــب يا عشق، زيما تدور سمّيهـا

نَسَلّم ليكْ نفوسنا نقول عسى نوفّيها
جمايلك ما اظن كل النفوس تكفيهـا

شلنا الروح نكوس دايرين فخر يحويها
حب الدوم هجم غـرز المخالـب فيهــا

نورك يا بلــد كل الفجج ضاوّيهــا
يا كل الفخــر و معانـــي بنغنيهـــا

بنحبك محبـة صريحــة ما نداريهـــا
لا يوم تذهب الروح راضية لى باريهــا

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  قريب محمد راجع في الأربعاء يناير 30, 2013 4:40 am

أخونا عبدالعظيم .... يا زول إنت وين ... عاش من شافك .... ليك وحشة كبيرة ....

والله ضحكت كتييييييييير ... (لغاية ما السعودي ال قاعد جنبى .. قال لي : ويش بك يا زول تضحك لحالك ).... من حكاية ... تشبيه ... أحمد مصطفي .. بي .. هيثم إدريس ... الظاهر ... إنتو زعلانين .. من هيثم إدريس شديد .....

بس يا أخوي عبدالعظيم .... في نجوم ما بيعجزوا ..... ولا بيخبو نجمهم . ....

الثلاثة ... نجوم ال ما بيختفوا ...... هم أربعة ... هيثم مصطفي ... والحضري ... وجمال الوالي ... وأحمد إدريس .....

عبدالرحمن محمد على خليفة محمد خليفة الجاب خليفة في الدنيا ... دا عبود ... لمن كان صغير .... يسألوه .. إسمك بالكامل منو ....
كان .. أكعب حاجة عندو .. لمن يرسلوه .. دكان ود محمود ... يخاف من بيت دسه لأنو يمر بي جنبو هو ماشي إلى الدكان ... (بيت الزعيم.. حسن محمد حسين حالياً ) وأنا كمان ....

أكتر زول كان يخاف منو .. هو عمنا الخير على بابكر ... أول ما يشوفو ..يقوم جاري ... وعمنا الخير ... يجري وراه ... هم الإثنين عارفين السبب .. زي (توم آند جيري) ....

عبود ... صاحبي شديد ... و زول نكته ... رأسو مليان ... بس ما لاقي طريقة .... يشجع المريخ ... وأحسن زول بخرخر .... لكن أسع ... إعتزل الحاجات دي كلها .. وبقى .. مولانا (أنصار سنة) ...عشان كدا ... عبود ... لا يفضل وجود ... سياسة ... رياضية .. في المنتدى ....

بس يا عبود أخوي أنا بقول ليك ... مع تسليطنا الضوء على الدوم ... وتركيزنا على إهتماماته .... أعتقد أنه .... ما في أي مشكلة في تفعيل كل أقسام المنتدى ... رياضية .. سياسية ..... أدبية ... ثقافية ... إجتماعية .. دينية ... إلخ ......

فقط على المشاركين ..... طرح أفكارهم ... وآراءهم بروح طيبة ... وحضارية .... وأخوية ... و التقيد بأدبيات النقاش .. والدردشة.........

بل بالعكس وجود أقسام كتيرة .. مفيد لأنه :
1- يوسع مدارك الإنسان المشارك .. ويتعلم أشياء جديدة ..
2- يتعلم ... أدبيات النقاش
3- طرح الأفكار والآراء ... والإستفادة من أفكار وأراء الآخرين
4- يتعلم الإنسان ... كيفية تجاذب أطراف الحديث مع الآخرين ..
5- تنويع ... مواضيع الدردشة ....

عموماً أنا من أنصار ... أن تظل ..كل أقسام المنتدى مفتوحه ... ومفعله ... ومتاحه للجميع ........ وعلى المشارك .. إختيار ما يناسبه ......

كعادته دائما ... يظل متوهجاً ... نجمنا الكبير .... وشاعرنا المرموق .... هيثم إدريس ... وينثر علينا درره ... التي تهز ... المشاعر .... عن الدوم الحبيب ... تشكرات كتيرة ... لشاعرنا الكبير .... هيثم إدريس ... وتنمى أن تظل دوماً نجماً .. ساطعاً .. وربنا يعطيك العافية .........

ختاماً .... الله يرحم عمنا محمد علي شبيل .. وأخونا المرحوم صلاح محمد علي شبيل ... ونسأل الله ان تظل .. (كرقة شبيل) ... الصالون الأدبي والثقافي .. الذي يحوي جميع أهل الدوم ....

تحية كبيرة ... للأخوان ..أحمد إدريس .. وعبد العظيم ... وعبود .. والأخت بثينة .... وجميع أهل الدوم ..... و من يحب الدوم ......

فُتكم ... بعافية ......


قريب محمد راجع

عدد المساهمات : 204
تاريخ التسجيل : 19/10/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الى منتدى جديد

مُساهمة  احمد ادريس عبيدون في الإثنين فبراير 04, 2013 12:16 am

قريب محمد راجع كتب:أخونا عبدالعظيم .... يا زول إنت وين ... عاش من شافك .... ليك وحشة كبيرة ....

والله ضحكت كتييييييييير ... (لغاية ما السعودي ال قاعد جنبى .. قال لي : ويش بك يا زول تضحك لحالك ).... من حكاية ... تشبيه ... أحمد مصطفي .. بي .. هيثم إدريس ... الظاهر ... إنتو زعلانين .. من هيثم إدريس شديد .....

بس يا أخوي عبدالعظيم .... في نجوم ما بيعجزوا ..... ولا بيخبو نجمهم . ....

الثلاثة ... نجوم ال ما بيختفوا ...... هم أربعة ... هيثم مصطفي ... والحضري ... وجمال الوالي ... وأحمد إدريس .....

عبدالرحمن محمد على خليفة محمد خليفة الجاب خليفة في الدنيا ... دا عبود ... لمن كان صغير .... يسألوه .. إسمك بالكامل منو ....
كان .. أكعب حاجة عندو .. لمن يرسلوه .. دكان ود محمود ... يخاف من بيت دسه لأنو يمر بي جنبو هو ماشي إلى الدكان ... (بيت الزعيم.. حسن محمد حسين حالياً ) وأنا كمان ....

أكتر زول كان يخاف منو .. هو عمنا الخير على بابكر ... أول ما يشوفو ..يقوم جاري ... وعمنا الخير ... يجري وراه ... هم الإثنين عارفين السبب .. زي (توم آند جيري) ....

عبود ... صاحبي شديد ... و زول نكته ... رأسو مليان ... بس ما لاقي طريقة .... يشجع المريخ ... وأحسن زول بخرخر .... لكن أسع ... إعتزل الحاجات دي كلها .. وبقى .. مولانا (أنصار سنة) ...عشان كدا ... عبود ... لا يفضل وجود ... سياسة ... رياضية .. في المنتدى ....

بس يا عبود أخوي أنا بقول ليك ... مع تسليطنا الضوء على الدوم ... وتركيزنا على إهتماماته .... أعتقد أنه .... ما في أي مشكلة في تفعيل كل أقسام المنتدى ... رياضية .. سياسية ..... أدبية ... ثقافية ... إجتماعية .. دينية ... إلخ ......

فقط على المشاركين ..... طرح أفكارهم ... وآراءهم بروح طيبة ... وحضارية .... وأخوية ... و التقيد بأدبيات النقاش .. والدردشة.........

بل بالعكس وجود أقسام كتيرة .. مفيد لأنه :
1- يوسع مدارك الإنسان المشارك .. ويتعلم أشياء جديدة ..
2- يتعلم ... أدبيات النقاش
3- طرح الأفكار والآراء ... والإستفادة من أفكار وأراء الآخرين
4- يتعلم الإنسان ... كيفية تجاذب أطراف الحديث مع الآخرين ..
5- تنويع ... مواضيع الدردشة ....

عموماً أنا من أنصار ... أن تظل ..كل أقسام المنتدى مفتوحه ... ومفعله ... ومتاحه للجميع ........ وعلى المشارك .. إختيار ما يناسبه ......

كعادته دائما ... يظل متوهجاً ... نجمنا الكبير .... وشاعرنا المرموق .... هيثم إدريس ... وينثر علينا درره ... التي تهز ... المشاعر .... عن الدوم الحبيب ... تشكرات كتيرة ... لشاعرنا الكبير .... هيثم إدريس ... وتنمى أن تظل دوماً نجماً .. ساطعاً .. وربنا يعطيك العافية .........

ختاماً .... الله يرحم عمنا محمد علي شبيل .. وأخونا المرحوم صلاح محمد علي شبيل ... ونسأل الله ان تظل .. (كرقة شبيل) ... الصالون الأدبي والثقافي .. الذي يحوي جميع أهل الدوم ....

تحية كبيرة ... للأخوان ..أحمد إدريس .. وعبد العظيم ... وعبود .. والأخت بثينة .... وجميع أهل الدوم ..... و من يحب الدوم ......

فُتكم ... بعافية ......

عباس .. الله ينور عليك .. كفيت ووفيت بس على كدا خربطتنا .. يعني انا اسمي هيثم ادريس ولاعب المريخ المشى من الهلال اسمو احمد مصطفى؟؟ طيب سيدا ياتو فينا ؟؟ وبعدين عبود بقى انصار سنة و ما بيحب الرياضة والسياسة في المنتدى والله انا ما انصار سنة وما عندي مانع في الرياضة والسياسة لكن والله المهاترات حتقفل لينا المنتدى تاني بعد الزخم البدا بيهو دا .. لا بد من سياسة ورياضة وكل صنوف النشاط في المنتدى لكن بلباقة ولياقة .. واهم شيء لما تكتب موضوع تختار شيء يشارك فيهو كل الناس عشان تجيبهم .. انا اشوف السياسة عندنا هنا زي الشي الصفوي .. يعني بس البعض يتناوله والرياضة اخف وطئا طالما هي بعيدة عن التعصب .. والله انا احب الرياضة والسياسة زي عيوني لكن زول اخاف المهاترات ويجينا رايش من هنا ولاّ هنا والزول العجوز زينا كدا تبقى المهاترات ما مقاسو .. الله يديك العافية وتعال نقعد نحرك الشغل..

احمد ادريس عبيدون

عدد المساهمات : 171
تاريخ التسجيل : 26/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى