الشعب يريد

استعرض الموضوع السابق استعرض الموضوع التالي اذهب الى الأسفل

الشعب يريد

مُساهمة  محمد حسن محمد في الأربعاء أبريل 20, 2011 6:03 am

لشعب يريد زيادة المصروف

الفاتح جبرا

يبدو أن ظاهرة الإعتصامات ..والاضرابات .. والمطالبات التى تشهدها الساحة العربية قد ألقت بظلالها على الجميع

فقد إستيقظت صباح اليوم على أصوات مظاهرات صاخبة ، خرجت من غرفتى لإستجلاء الامر لأفاجأ بان أبنائى ناجى ونشوى يطوفان بأرجاء المنزل وهم يحملان (قطعة كرتون) مكتوب عليها بالقلم الأسود الشينى (الشعب يريد زيادة المصروف) وقد حولا المنزل إلى ساحة (تحرير) حيث إمتلأت الجدران بالملصقات التى كتبت عليها بعض الشعارات والمطالب المختلفة من شاكلة :

* أوقفوا الصرف على السجائر
* لا تدخين بعد اليوم
* اللحمة أساس الحكم
* لاب توب لكل مواطن


ما أن شاهداني حتى إزدادت حدة هتافاتهما وتعالت ، إقتربت منهما طالبا منهما أن يتوقفا عن الهتاف وينفضا (ويفرتقوها) قبل أن أقوم بتفريقها مستخدماً القوة ..

- نفرتقا ليه؟

- مظاهرتكم دى غير قانونية

- لكن دى مظاهرة سلمية والدستور بيقول ...

- (مقاطعاً) : القانون بيقول تطلعوا ليها تصريح ! إنتو هسه عندكم ليها تصريح !

- كل ما نكلم ماما نقول ليها عاوزين تصريح تقول لينا ما بديكم عشان خايفة ناس يتدسوا وسطكم وتحصل مشاكل ! والبلطجية يجو ينضموا ليكم !

- وهسه إنتو عاوزين شنو؟

- عاوزنك تحقق لينا الحاجات دى قبل سقف المطالب بتاعنا يعلا !!

- يعلا دى شنو كمان يا أولاد اللذين ؟ أوع كمان يكون فيها (أرحل) دى تبقى مصيبة سوداء !

- إنتا كمان يا بابا بتخاف من (أرحل) دى زى الجماعة !!

- كيفن ما بخاف مكنكش فى أمكم دى ليا عشرين سنة .. أرحل أمشى وين يعنى ؟

- طيب لجنة (التغيير) عاوزه تقعد معاك !

- هلا .. هلا .. هو كمان عملتو ليكم لجنة تغيير ومفاوضات وكده !

- أيوه أنا الرئيس و(نشوى) المقرر !

وجلسنا سوياً .. وقد تفاجأت بأن أول بند تريد أن تناقشه (لجنة التغيير) هو (الفساد) ... نعم الفساد

- يا أولاد إنتو ما عندكم راس؟ فساد شنو كمان ؟ البيت ده لا بيعمل (عطاءآت) ولا (ببنى عمارات) ولا عندو جمعيات خيرية وهمية ولا بشيد طرق وأنفاق ولا عندو شركات وميزانيتو معروووفه وبتتراجع من (أمكم) على داير المليم .. أها الفساد ده يجى من وين؟

- الصرف البذخى ده ما فساد ؟.. لما ميزانية (السجائر) بتاعت حضرتك تكون أكبر من ميزانية (التعليم) ده مش إسمو فساد !

- (ضاحكاً) : فساد شنو يا أولاد إنتو جنيتو ؟ ما الدولة الإسمها دولة ميزانية (الأمن) فيها أكبر من ميزانية (التعليم) والصحة ذاااتا !

- الدولة عاوزة (تأمن روحا) لكن إنتا عاوز (تهلك روحك) ونحنا ما ح نسمح بالعملية دى

- لكن ...

- مافيش لكن .. موافق على إيقاف التدخين وتحويل ميزانيتو (للتعليم) وللا ما موافق؟

بينى وبينكم تحسباً لإرتفاع حدة الإعتصامات والإضرابات داخل المنزل وتخوفاً من رفع سقف المطالب والمسألة تبقى فيها (أرحل) وشنو ما عارف ولأن (التدخين ضار بالصحة) وجدت لزاماً علي ان ارضخ فوراً لهذا الطلب .

- أها المطلب التانى شنو؟

- زيادة المصروف عشان يتماشى مع زيادة الأسعار الكلو يوم دى ! إنتا هسه يا بابا عارف سندوتش الفول المصلح بى كم؟

- ما عارف !

- ما دى هى ذاااتا المشكلة .. لازم تكون ما عارف لأنك ما بتتفقد (شعبك) وما بتعرفوا بياكل شنو وبيشرب شنو والمصروف البتديهو ليهو ده كفاية وللا ما كفاية وبيقعدو كم يوم !!



بدون أى مناقشة تمت الموافقة على زيادة المصروف ليتلائم مع (سياسة التحرير) ! على الرغم من عجز الموازنة المنزلية وقلة الدخل وكثرة الإلتزامات وكمان بصراحة كده خوفا من (إرحل) !

وبعد أن تم إستعراض كافة المطالب وقبولها (طبعاً) طلبت من أعضاء (لجنة المفاوضات) إنزال كافة اللافتات وإزالة كافة الملصقات وإيقاف (المسيرات) غير أن الإجابة كانت حاسمة :

- عاوزين المطالب دى تتحقق فوراً !

- يا جماعة أدونى فرصة يومين تلاته أجتمع مع حكومتى أقصد (أمكم) عشان نتدارس الموضوع

- ما فيش حاجة إسمها تدارسوا الموضوع .. ليكم عشرين سنة ما إتدارستو ليه؟ منتظرين شنو ؟ لازم المطالب دى تتنفذ فوراً وإلا ...

- كمان جابت ليها تهديد ... وإلا شنو؟

وهنا قامت نشوى من مكانها متجهة ناحية (الكاميرا) التى كانت تخفيها فى مواجهتى بعناية وأحضرتها قائلة :

- ما تهديد ولا حاجة بس ح نقوم نرسل الشريط ده (للجزيرة) !!


كسرة :

عشان كل حاجة ولا (تغطية الجزيرة) .. قمت بتنفيذ المطالب على الفور !

محمد حسن محمد

عدد المساهمات : 80
تاريخ التسجيل : 13/04/2011
العمر : 45
الموقع : الرياض

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

كم انته رايع

مُساهمة  شرف الدين القاضى في الأحد أبريل 24, 2011 10:04 am

يا سلام يا محمد حسن كم انته رايع وانته تجعل من بيتك واسرتك وطننا يتجسد فيهو الشعب بكل تفاصيله واعتقد تمام ان رسالتك وصلت والتحيه للعصفورين ناجى ونشوى اصحاب السناريو والاخراج فى هذا الموضوع الجميل واعتقد انه ما كتبته واقع فى كثير من الدول والحكومات اتمنى ان ينتبه الحكام قبل فوات الاوان ليس لى من العلم ما انتقد فى هذا المقال المقال جميل ومطمونه جميل بس اعتقد لو انتشر على نطاق واسع سوف يجد صدى وتجاوب من الكثيرين اتمنى ان ترسله على الموقع الرسمى لصحيفة الاهرام اليوم وانا اثق انهم سيقومون بنشره لاسيما وأن الهندى عز الدين من الزين يحملون رليت الاصلاح فى العمل العام وهو صاحب قلم جرده وطوعه لخدمة الشعب اتمنى ان ترسله وهو سيجد القبول ...شكرا كتير اخ محمد حسن هاكذا انتم دوما تصنعون الابداع وهكذا نحن منكم نستفيد امنى ان يرى هذا الموضوع النشر قريبا وانا من هنا ادعوك للمشاركه معنا عبر الفيس بوك فى مجموعه سميناها الشوق للبلد لكى نخلق التواصل الحميم بين الشباب .
شكرا كتير واتمنى اتن لاتنقطع عن الكتابه حتى نستفيد من ما تختزنه من علم
ودمته زخرا للوطن وللدوم

شرف الدين القاضى

عدد المساهمات : 4
تاريخ التسجيل : 16/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى