أذا كان في وسعك أن تحب ففي وسعك أن تفعل أي شيء

أخواني وأهلي ..بحبكم في الله.. والله عن جد اللي بعرفه و اللي عرفني بيهو المنتدي ويكفي إننا أرحام ودي براها ما ساهله وأجرها وبركتها في الدنيا قبل الأخرة ..شديد على النفس ومضر بالحياة ومقصٌر في الأعمار أن تتحول حياتنا لكتل من الصدامات واللوم والبكاء على الفات ..صدقوني لو بس تخيلت إنو الشخص المخاصمه ده ح يجيك أعوذ بالله خبره والله ومتاكده ح تندم ندم السنين وبحلف صادقه لأنو أولاد بلدي ما فيهم إلا الخير والطيبه وما ندمت أبداً علي معرفه أي فرد فيكم والي خلاني أقول كده لما العيد الفات بكيت وقلته ليهم أنتو أمي وأبوي وأخواني وبكوا الموجودين معاي ما مجامله لي أبداً بكوا غصباً عليهم واتذكروا أهلهم وعرفوا إنو لو ما لمتنا دي كيف يكون الحال ...ولو ما ناس الدوم الطيبين ديل ما عارفه شكل الحياة ممكن يكون كيف مع الغربه..بكيت ما ضعف مني أبداً ولا متخاصمه مع حد والحمدلله ..بكيت لما اتذكرتا أمي وأبوي وأخواني ..ويكيت عشان كنا ناقصين وفي كتير من الأسر ما متواجدين في العيد..لظروف او لخصام ولازم نكون واضحين نحن أهل ولازم نتلم ومهما كان الخلاف كلكم علي حق والحق اللي بقصده هو عشرتكم وأيامكم الجميله حرام أبليس ينتصر علينا لازم نهزمه ..عليكم الله تعالوا وخليكم أكبر من كده كل واحد ما كان معانا خساره بالنسبه لينا والقوي هو اللي بيسامح ..وقدوتنا الرسول صلى الله عليه وسلم ""سامح كفار قريش"" العبارة دي حقت أمي الله يديها العافيه ..يا يمه رسلي لي عفوك..........